बॉक्स ऑफिसवर 'छावा'ची दमदार कमाई, मार्वल च्या 'Captain America: Brave New World'ला टक्कर!
Total Views |
मुंबई : १४ फेब्रुवारी २०२५ रोजी प्रदर्शित झालेल्या विकी कौशल आणि रश्मिका मंदान्ना यांच्या 'छावा' चित्रपटाने दुसऱ्या दिवशी, म्हणजेच शनिवारी, ५१.०२ कोटींची कमाई केली आहे. पहिल्या दिवशीच्या ३१ कोटींच्या तुलनेत हा मोठा उडी घेतलेला आकडा आहे. मुंबई सर्किटमध्येच या चित्रपटाने १५ कोटींची कमाई केली आहे, ज्यामुळे महाराष्ट्रातील प्रेक्षकांचा उत्साह दिसून येतो. शनिवारी रात्रीच्या शोमध्ये आणखी वाढ होण्याची शक्यता आहे, ज्यामुळे एकूण कमाईत वाढ होऊ शकते.
दुसरीकडे, 'कॅप्टन अमेरिका : ब्रेव न्यू वर्ल्ड' या मार्वल च्या चित्रपटाने अमेरिकेत पहिल्या दिवशी ४० दशलक्ष (अंदाजे 320 कोटींची) कमाई केली आहे. जागतिक स्तरावर हा चित्रपट चांगली कामगिरी करत असला तरी, भारतीय बॉक्स ऑफिसवर 'छावा' अधिक प्रभावी ठरत आहे. भारतात कॅप्टन अमेरिका : ब्रेव न्यू वर्ल्ड या चित्रपटाने आत्तापर्यंत बॉक्स ऑफिस वर ८.९४ कोटींची कमाई केली.
'छावा' चित्रपटात विकी कौशल यांनी छत्रपती संभाजी महाराजांची भूमिका साकारली आहे, तर रश्मिका मंदान्ना यांनी त्यांच्या पत्नी महाराणी येसुबाई यांची भूमिका निभावली आहे. लक्ष्मण उतेकर दिग्दर्शित या चित्रपटात अक्षय खन्ना यांनी औरंगजेबाची भूमिका साकारली आहे.
विकी कौशल यांनी या भूमिकेसाठी शारीरिक आणि मानसिक तयारी केली असून, ही भूमिका त्यांच्या करिअरमधील सर्वात आव्हानात्मक असल्याचे त्यांनी सांगितले आहे. चित्रपटाच्या यशामुळे त्यांच्या मेहनतीचे फळ मिळाल्याचे दिसून येते.