भारतीय लष्कराकडून सोशल मीडिया वापराच्या नियमांमध्ये मोठा बदल! केवळ ‘पॅसिव्ह पार्टिसिपेशन’ राहणार अनिवार्य

 

मुंबई : (Indian Army Social Media Policy) भारतीय लष्कराने आपल्या सैनिकांसाठी आणि अधिकाऱ्यांसाठी सोशल मीडिया वापराच्या नियमावलीत महत्त्वाचे बदल केले आहेत. नवीन मार्गदर्शक तत्त्वांनुसार, लष्करी कर्मचाऱ्यांना आता ‘इन्स्टाग्राम’ वापरण्याची परवानगी देण्यात आली आहे. मात्र, ही मुभा अत्यंत कडक अटींसह असून केवळ ‘व्ह्यू-ओन्ली’ म्हणजेच फक्त मजकूर पाहण्यापुरती मर्यादित असेल. लष्कराच्या मुख्यालयाने मिलिटरी इंटेलिजन्स विभागातर्फे हे आदेश जारी केले असून त्यांची अंमलबजावणी तात्काळ प्रभावाने सुरू झाली आहे. (Indian Army Social Media Policy)

युट्युब, एक्स (ट्विटर), कोरा, इन्स्टाग्राम यांसारख्या समाजमाध्यमांवर कोणतेही संदेश किंवा प्रतिक्रिया टाकू नयेत, असे स्पष्ट आदेश भारतीय लष्कराने आपल्या अधिकारी आणि कर्मचाऱ्यांना दिले आहेत.या समाजमाध्यमांवरील घडामोडींची फक्त माहिती घ्यावी, कोणतीही पोस्ट किंवा टिप्पणी करू नये, असे लष्कराने पाठवलेल्या पत्रात नमूद करण्यात आले आहे. तसेच स्काइप, व्हॉटसअप, टेलिग्राम, सिग्नल या ॲप्सद्वारे फक्त गुप्त नसलेल्या माहितीचीच देवाणघेवाण करावी, असेही लष्कराने स्पष्ट केले आहे. लिंक्डइन या व्यासपीठावर केवळ व्यावसायिक माहिती आणि नोकरीसंदर्भातील तपशील देण्याची परवानगी देण्यात आली आहे. (Indian Army Social Media Policy)

राष्ट्रीय सुरक्षेच्या दृष्टीने हा निर्णय महत्त्वाचा मानला जात असून, सायबर सुरक्षितता आणि माहिती गळती रोखणे हा यामागचा मुख्य उद्देश असल्याचे सांगण्यात येत आहे.