‘राष्ट्र प्रेरणा स्थळ’ भारताच्या आत्मसन्मान आणि एकतेचे प्रतीक : पंतप्रधान नरेंद्र मोदी

"२५ डिसेंबर हा दिवस भारतासाठी विशेष महत्त्वाचा असून, भारतरत्न मदनमोहन मालवीय आणि अटलबिहारी वाजपेयी यांची जयंती याच दिवशी येते, भारताची ओळख, एकता आणि स्वाभिमानाचा पाया या दोन्ही महान नेत्यांनी रचला", असे मोदी म्हणाले. तसेच जम्मू-काश्मीरमधून कलम ३७० हटवून डॉ. श्यामाप्रसाद मुखर्जी यांचे स्वप्न पूर्ण झाल्याचेही त्यांनी नमूद केले. सुशासन, गरीबी निर्मूलन, आणि बँकिंग-विमा सुविधा सामान्य लोकांपर्यंत पोहोचवणे हा आमचा मार्ग असल्याचे त्यांनी अधोरेखित केले. भाषणाच्या सुरुवातीला पंतप्रधानांनी देशवासीयांना नाताळच्या शुभेच्छाही दिल्या.(PM Narendra Modi)

या कार्यक्रमाला संरक्षणमंत्री राजनाथ सिंह, राज्यपाल आनंदीबेन पटेल आणि मुख्यमंत्री योगी आदित्यनाथ उपस्थित होते. भारताचे माजी पंतप्रधान भारतरत्न अटलबिहारी वाजपेयी यांच्या जन्मशताब्दी वर्षानिमित्त हा भव्य उपक्रम राबविण्यात आला आहे.

६५ एकर परिसरात उभारलेल्या या प्रेरणास्थळात डॉ. श्यामाप्रसाद मुखर्जी, पंडित दीनदयाळ उपाध्याय आणि अटलबिहारी वाजपेयी यांचे ६५ फूट उंच कांस्य पुतळे स्थापित करण्यात आले आहेत. तसेच या महान राष्ट्रनेत्यांच्या कार्य आणि विचारांचे प्रदर्शित करणारे आधुनिक वास्तुसंग्रहालयही येथे उभारले आहे.पंतप्रधान नरेंद्र मोदी (PM Narendra Modi) यांनी तिन्ही नेत्यांच्या पुतळ्यांना पुष्पांजली अर्पण करून अभिवादन केले आणि राष्ट्रनिर्मितीतील त्यांच्या योगदानाचे स्मरण केले.(PM Narendra Modi)