नागपूर–चंद्रपूर शीघ्रसंचार द्रुतगती महामार्गाच्या 204 किमी सुधारित आखणीला मंजुरी
Total Views |
मुंबई : ( CM Devendra Fadnavis ) मुख्यमंत्री देवेंद्र फडणवीस यांच्या अध्यक्षतेखाली आज विधान भवन येथे मंत्रिमंडळ पायाभूत सुविधा समितीची बैठक संपन्न झाली.
नागपूर - चंद्रपूर शीघ्रसंचार द्रुतगती महामार्गाअंतर्गत केंद्र शासनाच्या गतीशक्ती पोर्टलकडून प्राप्त सूचनांचा विचार करून एकूण 204 किलोमीटर लांबीच्या सुधारित रस्ता आखणीस मान्यता दिली आहे. हिंदूहृदयसम्राट बाळासाहेब ठाकरे महाराष्ट्र समृद्धी महामार्गावरील सेलडोह इंटरचेंज ते दुर्ग हैदराबाद महामार्गावरील नवेगाव (मोर)पर्यंत महामार्ग बांधण्यात येणार आहे. याची एकूण लांबी 192 किलोमीटर असणार आहे. तसेच 11 किलोमीटर लांबीचा चंद्रपूर जोड रस्ता पूर्वीच्या आखणीनुसार कायम ठेवण्यात आला आहे. मात्र सुधारित रस्ता आखणीमुळे 27 हेक्टर वन क्षेत्र संपादनात आता बचत होणार आहे. तसेच मुंबई शहरातील घाटकोपर पूर्व, चेंबूर आणि अंधेरी (प.) आंबिवली मुद्रण कामगार नगर व चुनाभट्टी येथील भूखंडांचा खासगीकरणाच्या माध्यमातून विकासाच्या मुदतवाढीस देखील मान्यता देण्यात आली.
यावेळी मुख्यमंत्री फडणवीस म्हणाले की नागरीकरणाचा वेग वाढत असल्यामुळे शहरांमध्ये निर्माण होणारी वाहतूक कोंडीची समस्या सोडविण्यासाठी शासनाचं प्राधान्य आहे. मुख्यमंत्री देवेंद्र फडणवीस पुढे असेही म्हणाले की, पुणे जिल्ह्यातील हडपसर ते यवत मार्गावर वाहतूक कोंडी सोडवण्यासाठी विविध उपाययोजना करण्यात याव्यात. भैरोबा नाल्याजवळील वाहतूक कोंडी सोडवण्यासाठी आवश्यक व तातडीच्या उपाययोजना कराव्यात या मार्गावर रस्त्याची सुधारणा करण्यात येऊन उन्नत महामार्ग बांधण्यात यावं, मात्र हे करताना नागरिकांना कुठल्याही प्रकारची गैरसोय होणार नाही, याची काळजी घ्यावी. ं
राज्यात सुरू असलेले पायाभूत सुविधांचे प्रकल्प तसेच प्रस्तावित प्रकल्पांना गती शक्ती पोर्टलकडून मान्यता घ्यावी. प्रत्येक प्रकल्प गतिशक्ती पोर्टलकडून मान्यता आल्यानंतरच समितीच्या बैठकीसमोर यावा, असे निर्देशही मुख्यमंत्री फडणवीस यांनी यावेळी संबंधित अधिकाऱ्यांना दिले.
यावेळी उपमुख्यमंत्री एकनाथ शिंदे, उपमुख्यमंत्री अजित पवार, मंत्री चंद्रशेखर बावनकुळे, मंत्री शिवेंद्रसिंहराजे भोसले व संबंधित अधिकारी उपस्थित होते.