काँग्रेस आणि त्यांच्या इकोसिस्टीमला देशातील हिंदू सणांचेच वावडे का? बावनकुळेंचा सवाल

 

 

मुंबई : काँग्रेस व त्यांच्या इकोसिस्टीमला देशातील बहुसंख्य हिंदू व हिंदू सणांचे वावडे का? असा सवाल भाजप प्रदेशाध्यक्ष चंद्रशेखर बावनकुळेंनी केला आहे. पंतप्रधान नरेंद्र मोदींनी सरन्यायाधिश धनंजय चंद्रचूद यांच्या घरच्या गणपतीचे दर्शन घेतल्याने विरोधकांनी त्यांच्यावर टीका केली. यावर आता बावनकुळेंनी प्रत्युत्तर दिले.

 

चंद्रशेखर बावनकुळे म्हणाले की, "जेव्हा जेव्हा हिंदू आणि हिंदूंचे सण या देशात आनंदाने आणि उत्साहाने साजरे होतात तेव्हाच त्यात खुसपटं काढण्याचे काम काँग्रेस व इकोसिस्टीम करत असते. पंतप्रधान नरेंद्र मोदींनी सरन्यायाधीश न्या. चंद्रचूड यांच्या निवासस्थानी गणरायाची आणि महालक्ष्मीची पूजा, आरती काय केली, अख्ख्या काँग्रेस व इकोसिस्टीमच्या गोटात आगडोंब उसळला आहे."

 

 

"यापूर्वीचे पंतप्रधान जेव्हा आपल्या निवासस्थानी इफ्तार पार्ट्या द्यायचे आणि त्याला सरन्यायाधीश उपस्थित राहायचे तेव्हा ही मंडळी झोपली होती का? आणि यांना हिंदू आणि विशेषतः मराठी माणसांच्या सण समारंभालाच बरी जाग आली. सध्याचे सरन्यायाधीश महाराष्ट्राचे आहेत, ही सर्वच मराठी माणसांसाठी अभिमानास्पद बाब आहे. त्यांच्याकडे विराजमान असलेल्या बाप्पाची पूजा करण्यासाठी पंतप्रधान महोदयांनी जाणे, हा आपल्यासाठी आनंदाचा विषय आहे. पण, महाराष्ट्राचा, मराठी माणसांचा, हिंदूंचा आनंद काँग्रेस व इकोसिस्टीमला कसा देखवेल?" असा टोला त्यांनी लगावला.

 

ते पुढे म्हणाले की, "या इकोसिस्टीमने काहीही निरर्थक नरेटीव्ह सेट करण्याचा प्रयत्न केला तरी महाराष्ट्रातील आणि देशातील सुज्ञ जनता यांच्या नालायकपणाला बधनार नाही. गणपती ही बुध्दीची देवता आहे. या गणेशोत्सवाच्या निमित्ताने बाप्पाकडे माझे मागणे आहे की, हे गणराया या काँग्रेस व इकोसिस्टीमला सर्व सामान्यांच्या आनंदात सहभागी होण्याची सुबुद्धी दे," असेही ते म्हणाले.