राज ठाकरे मनोज जरांगेंची भेट घेणार? मराठा आंदोलकांशी काय चर्चा झाली?

06-Aug-2024

Total Views | 49

धाराशीव : मनसे अध्यक्ष राज ठाकरे हे मनोज जरांगेंची भेट घेणार असल्याचे सांगण्यात येत आहे. आगामी विधानसभा निवडणूकीच्या पार्श्वभूमीवर राज ठाकरे सध्या मराठवाडा दौऱ्यावर आहेत. दरम्यान, यावेळी ते आरक्षणासंबंधी जरांगेंची भेट घेणार असल्याची माहिती पुढे आली आहे.

सोमवारी राज ठाकरेंनी सोलापूरमध्ये पत्रकार परिषद घेतली. यावेळी त्यांना आरक्षणाबद्दलचा प्रश्न विचारला असता महाराष्ट्रात सगळ्या गोष्टी इतक्या मुबलक प्रमाणात आहेत की, इथे आरक्षणाची गरजच नाही, असं वक्तव्य केलं होतं. त्यानंतर रात्री राज ठाकरे मुक्कामी असलेल्या धाराशीवमधील एका हॉटेलमध्ये मराठा आंदोलक गेले. राज ठाकरेंनी आरक्षणाबाबत आपली भूमिका स्पष्ट करावी, अशी मागणी त्यांनी केली.

यावेळी राज ठाकरेंनी या आंदोलकांशी चर्चा केली. महाराष्ट्रात आरक्षणाची गरज नाही, ही माझी भूमिका आहे, असे त्यांनी सांगितले. तसेच मराठा आरक्षणाबाबत मी मनोज जरांगेंशी चर्चा करणार आहे, असेही ते म्हणाले. या दौऱ्यावेळी आपण मनोज जरांगेंची भेट घेणार असल्याचेही त्यांनी या आंदोलकांना सांगितले. त्यामुळे आता राज ठाकरे मनोज जरांगेंची भेट घेणार असल्याची चर्चा राजकीय वर्तुळात रंगली आहे.