अश्रुंचे मोल!

जोकोव्हिचची अवस्था त्या कवितेतील सम्राटासारखी होती. ‘स्वामी तिन्ही जगाचा आईविना भिकारी’. 24 ग्रॅण्डस्लॅम जिंकूनही ऑलिम्पक सुवर्ण पदकने त्याला आजवर हुलकावणी दिली होती. गेल्या टोकियो ऑलिम्पिकमध्येही स्पेनच्याच पाब्लो बुस्टाने त्याला कांस्य पदकाच्या मॅचमध्ये पराभूत केले होते. एकूणच जोकोव्हिचला ऑलिम्पिक पदकाला स्पेनच्या खेळाडूंचा नेहमीच अडथळा राहिला होता आणि यंदा तर साक्षात स्पेनचा सुपरस्टार 21 वर्षीय कार्लोसशी जोकोव्हिचचा अंतिम फेरीमध्ये मुकाबला होता. कार्लोसने अवघ्या 21 दिवसांपूर्वी याच जोकोव्हिचला पराभूत करीत विम्ब्लडनचे विजेतेपद मिळवले होते. विम्बल्डनच्या अंतिम फेरीचा ‘रिमेक’ म्हणून या पॅरिस ऑलिम्पिकच्या अंतिम फेरीकडे पाहिले जात होते. कार्लोस तुफान फॉर्ममध्ये होता. टेनिसमधील अनुभवविरुद्ध सळसळते तारुण्य, असा तुफानी मुकाबला होता. अनुभवाने तारुण्यावर मात केली, असे मी म्हणणार नाही, तर त्या तारुण्याला दीपस्तंभासारखा पुढील वाटचालीसाठी जोकोव्हिचने आदर्श घालून दिला. पॅरिसमधील रोलँड गारोसवरील तांबड्या मातीवर जोकोव्हिचने ढाळलेल्या प्रत्येक अश्रूतून टेनिसमधील नव्या कळ्या फुलतील आणि बहरतील...

संदीप चव्हाण