माता ते माती...

अमनचा कातर झालेला आवाज आपल्या हृदयाला पीळ पाडतो. आईवडिलांचे छत्र हरपल्यावर अमनने छत्रसाललाच आपले घऱ बनवले. कुस्तीची माती त्याची आई बनली. ‘माता’ ते ‘माती’ या शब्दात फरक फक्त वेलांटीचा आहे. माता जिने अमनला जन्म दिला आणि माती जिने आपल्या अंगाखांद्यांवर अमनला खेळवले. कुस्तीचे धडे दिले. याच मातीत तो पडला... सावरला...खरचटला. मातीने त्याला मातेची ममताही दिली. आज अमनने पॅरिसमध्ये 57 किलो वजनी गटातील ऑलिम्पिकचे ब्राँझ मेडल जिंकून ‘माता’ आणि ‘माती’ दोघांचेही ऋण फेडले. वेलांटीचा हा प्रवास आता काही क्षण पॅरिसमध्ये विसावलाय. सरजी यहा रुकना नही है. अभी तो देश के लिए ऑलिम्पिक का गोल्ड जितना है. बस यही अब मकसद है.... अमनच्या बोलण्यात आजही एक लहान मूल दडल्याचे सारखं जाणवत राहते. भारताचे कुस्तीतील हे आठवे मेडल आहे. त्यात सुशीलच्या 1 सिल्व्हर आणि सात ब्राँझ मेडलचा समावेश आहे. अमनचा धडाका आणि वय पाहता तो आगामी 2028 च्या लॉस एंजलिस ऑलिम्पिकमध्ये नक्की गोल्ड मेडलला गवसणी घालू शकेल.

अमन भारतीय ऑलिम्पिकच्या इतिहासातील सर्वात लहान वयात मेडल जिंकणारा खेळाडू ठरलाय. वयाच्या 21 वर्षे आणि 24 व्या दिवशी त्याने ऑलिम्पिकचे मेडल जिंकले आहे. अमनमधील गुणवत्तेला पैलू पाडले ते छत्रसालमधील त्याचे गुरु ललित कुमार यांनी. 2021 मध्ये अमनने पहिल्यांदा कुस्तीची राष्ट्रीय स्पर्धा जिंकली. त्यानंतर 2022 मध्ये 23 वर्षांखालील जागतिक कुस्ती स्पर्धेत अमनने गोल्ड मेडल जिंकले. या स्पर्धेतले भारताचे आजवरचे हे पहिलेच गोल्ड मेडल होते. त्यानंतर झालेल्या एशियन गेम्समध्येही अमनने ब्राँझ मेडल जिंकले. त्यानंतरच्या आशियाई कुस्ती स्पर्धेत अमनने गोल्ड मेडल कमावले.आक्रमक कुस्ती ही अमनची खासियत आहे. या ऑलिम्पिकमध्ये गोल्ड मेडल विजेत्या जपानच्या खेळाडूविरुध्द त्याला सेमीफायनलमध्ये पराभव पत्करावा लागला. पण ब्राँझ मेडल मिळवताना बाकी सर्व लढती या अमनने मोठ्या फरकाने जिंकल्या आहेत. अमनचा हा आक्रमकपणाच त्याला यशोशिखरावर घेऊन जातोय.

संदीप चव्हाण