जळगावातील चोपडा बसस्थानकाला ५० लाखांचे बक्षीस

राज्यभरातील ५६३ बस स्थानकांमध्ये होती स्पर्धा

    26-Jun-2024
Total Views |

chopda
मुंबई, दि.२६ : महाराष्ट्रातील सर्वसामान्यांची जीवनवाहिनी असणाऱ्या लालपरीचे रुपडे आता दिवसेंदिवस बदलते आहे. अशावेळी राज्यातील सर्व बसस्थानके स्वच्छ आणि सुशोभित करण्याचा महाराष्ट्र राज्य परिवहन महामंडळाचा मानस आहे. याच पार्श्वभूमीवर राज्य परिवहन महामंडळाने घेतलेल्या 'हिंदुह्दयसम्राट बाळासाहेब ठाकरे स्वच्छ, सुंदर बसस्थानक' अभियानांतर्गत 'अ' वर्ग राज्यात जळगाव जिल्ह्यातील चोपडा बसस्थानकाने प्रथम क्रमांक पटकाविला आहे.या बसस्थानकाला ५० लाखाचे बक्षीस मिळाले असल्याची माहिती महामंडळाने दिली आहे.
दरम्यान, राज्य परिवहन महामंडळाच्या या अभियानांतर्गत 'ब' वर्ग राज्यात भंडारा जिल्ह्यातील साकोली बसस्थानकाचा राज्यात पहिला क्रमांक आला असून या बसस्थानकाला रू.२५ लाखाचे बक्षीस मिळाले आहे. तसेच 'क' वर्ग राज्यात सातारा जिल्ह्यातील मेढा बसस्थानकाचा प्रथम क्रमांक आला असून, या बसस्थानकाला रू.१० लाखाचे बक्षीस मिळाले आहे.
लोकसहभागातून बसस्थानकाचा विकास
मुख्यमंत्री तथा एसटी महामंडळाचे अध्यक्ष एकनाथ शिंदे यांच्या संकल्पनेतून १मे,२०२३ ते ३० एप्रिल,२०२४ या काळामध्ये एसटी महामंडळाच्या सर्व बसस्थानकांवर "हिंदुहृदयसम्राट बाळासाहेब ठाकरे स्वच्छ, सुंदर बसस्थानक अभियान" राबविले गेले. 'लोकसहभागातून बसस्थानकाचा विकास' या संकल्पनेवर आधारित राबविण्यात आलेल्या या अभियानामध्ये स्थानिक लोकांच्या सहकार्यातून बसस्थानक व बसस्थानक परिसराचे सुशोभिकरण, आकर्षक रंगरंगोटी, मोकळ्या जागेमध्ये बागबगीचा, वृक्षरोपण, प्रवाशांसाठी बसस्थानकांवर वॉटरकुलर, घड्याळ, सेल्फीपॉईंट ही कामे करण्यात आली.


chopda
राज्यभरातील ५६३ बसस्थानकांत होती स्पर्धा
या बरोबरच प्रवाशांना मिळणाऱ्या सेवा-सुविधा, बस गाड्यांच्या स्वच्छतेबरोबरच त्यांची तांत्रिक दुरूस्ती देखभाल या सर्व घटकांचा विचार करून वर्षभरात वेगवेगळया सर्वेक्षण समितीच्या माध्यमातून बसस्थानकांचे मूल्यांकन करण्यात आले. ही स्पर्धा राज्यभरातील ५६३ बसस्थानकांवर घेण्यात आली असून, या सर्व बसस्थानकांचे त्या बसस्थानकांवरील प्रवासी चढ-उताराच्या संख्येवरून अ, ब, क वर्गात वर्गीकरण केले होते. या स्पर्धेसाठी तब्बल अडीच कोटी रूपयाची बक्षीसे देण्यात येणार असून, येत्या १५ ऑगस्टला बक्षीस पात्र बसस्थानकांचा सत्कार करण्यात येणार आहे.