एक चूक आणि शिक्षा शंभर पिढ्यांना....

सध्या सुरू असलेल्या निवडणूकरूपी युद्धातदेखील अनेक जण उघडपणे असे सांगतात की, मोदींविषयी आमची काहीही तक्रार नाही. पण, लोकसभा निवडणुकीसाठी रिंगणात असलेले काही उमेदवार मात्र योग्य नाही. पण, असा तक्रारीचा सूर आळवणारे लोक हे विसरतात की, युद्धकाळात सेनापतीने घेतलेल्या निर्णयावर शंका घ्यायची नसते, तर त्याचे पालन करायचे असते. युद्धात प्रत्येक सैनिकामध्ये सेनापतीला पाहत, देशाच्या विजयासाठी अथक प्रयत्न करण्याचे व्यापक लक्ष्य ठेवायचे असते.

गजनवी आणि घोरी यांनी केलेले भारतावरील आक्रमण हे आपल्या पूर्वजांच्या फक्त स्वत:पुरते पाहण्याच्या वृत्तीचा परिणाम होता. ३० कोटी भारतीयांवर अडीचशे वर्षे इंग्रजांनी राज्य केले भारतीयांच्या कूपमंडूक वृत्तीमुळेच! याच भारतीयांनी जालियनवाला इथे इंग्रजांच्या सांगण्यावरून, आपल्याच देशबांधवांवर गोळीबार केला. स्वातंत्र्यवीर सावरकरांसारख्या अनेक क्रांतिकारकांवर अत्याचार करण्याचा आदेश देणारे विदेशी असले, तरी त्याच अमानुषपणे त्याची अंमलबजावणी करणारे भारतीयच होते, हे विसरून चालणार नाही. जेव्हा भगतसिंग, राजगुरू, सुखदेव यांना फाशीची शिक्षा देण्यासाठी लाहोर इथल्या न्यायाधीशांना स्थानिक साक्षीदारांची आवश्यकता होती, तेव्हा ३०० भारतीयांनीच साक्ष दिली असल्याची नोंद राष्ट्रीय अभिलेखागारात आहे. देशाच्या पारतंत्र्याऐवजी आम्हा भारतीयांना इंग्रजांकडून मिळणार्‍या मानमरातब महत्त्वाचा वाटला आणि याच वृत्तीने आम्ही भारतीयांनी या देशाचे अतोनात नुकसान केले, हे कदापि विसरुन चालणार नाही.

एका राष्ट्राच्या निर्मितीत रस्ते, वीज यांचे महत्त्व आहे, त्याचप्रमाणे राष्ट्राचे चैतन्य जागृत होऊन, राष्ट्र विकासावाटेवर अग्रेसर झाले, तेव्हा देशाच्या वाईटावर उठलेल्या परदेशी शक्ती व्यथित झाल्या. ते भारताचा हा विकासरथ काहीही करून थांबवण्याचा प्रयत्न करत आहेत. इतिहासाप्रमाणे त्यांना मदत करणारे हे भारतीयच आहेत. पराक्रमी नेतृत्व कायमच एक उन्नत राष्ट्रनिर्मितीचा प्रयत्न करते, मोफत पाणी, वीज, लॅपटॉप यांची खैरात वाटत नाही. जर एखाद्या देशासाठी सर्वस्व अर्पण केलेल्या सैनिकांचे बलिदान त्या देशातील नागरिकांना योग्य, सशक्त नेतृत्व निवडीसाठी प्रेरणा देत नसेल, तर हे त्या देशाचे दुर्दैवच म्हणावे लागेल.

असे हजारो स्वयंसेवक आहेत, ज्यांनी प्रचारासाठी बाहेर पडताना, आपल्या जन्मदात्या आईचे आशीर्वाद घेताना, भारतमातेला विजयी करणे, हेच या जीवनाचा अंतिम उद्देश असल्याचे वचन दिले होते. त्यांच्या या वचनाला पूर्ण करण्याची जबाबदारी त्या सर्व भारतीयांचीदेखील आहे. त्यांच्या तपःसाधनेला यश येण्याचा हाच तो क्षण आहे, त्यासाठी देशविरोधी शक्तींच्या विरोधात, बहुसंख्येने मतदान करण्याचे कर्तव्य भारतीयांना पार पाडावे लागेल. अशा अनेक प्रचारकांपैकी एक आहेत नरेंद्र मोदी. त्यांनी घेतलेल्या अनेक साहसी निर्णयांमुळेच हा देश सामर्थ्यशाली होण्याच्या राजपथावर अग्रेसर झाला आहे...सर्व भारतीयांसाठी योग्य निर्णय घेण्याचा निर्णायक क्षण आहे.

जेणेकरून कधी कोणाला असे म्हणण्याची वेळ येऊ नये की, ‘लम्हों ने खता की थी - सदियों ने सजा पायी।’ असे म्हणायच्या ऐवजी, ‘लम्हों ने संभाला था - सदियों ने संवारा हैं।’ असे आत्मविश्सावासने म्हणणे अधिक संयुक्तिक ठरेल.