महादेव बेटिंग ॲप प्रकरणी साहिल खानला १ मे पर्यंत पोलीस कोठडी

 

 

 

मुंबई : अभिनेता साहिल खानला महादेव बेटिंग ॲप (Mahadev Betting App) प्रकरणात २८ एप्रिल रोजी छत्तीसगढमधून मुंबई पोलिसांनी अटक केली होती. यानंतर आता साहिलला १ मे पर्यंत पोलीस कोठडी सुनावण्यात आली आहे. काही दिवसांपुर्वी मुंबई उच्च न्यायालयाने त्याचा अटकपूर्व जामीन अर्ज देखील फेटाळला होता. महादेव बेटींग ॲपचा प्रसार केल्याप्रकरणी (Mahadev Betting App) साहिल खानला चार दिवसांची पोलीस कोठडी सुनवाण्यात आली आहे.

 

महादेव बुक बेटिंग अ‍ॅपप्रकरणात हिंदी चित्रपटसृष्टीतील अनेक कलाकार अडचणीत सापडले होते. याच प्रकरणात मुंबई पोलिसांच्या गुन्हे शाखेने अभिनेता साहिल खान याच्यासह तीन जनांना समन्स पाठवले होते. परंतु त्या चौकशीसाठी साहिल गैरहजर होता. यानंतर पुढील कारवाई करत साहिल खानला महादेव बेटिंग ॲपचा प्रचार आणि प्रसार केल्याप्रकरणी मुंबई पोलिसांनी छत्तीसगडमधून अटक केली.

 

महादेव बेटिंग ॲपचा प्रसार आणि प्रचार, ॲपचा प्रचार करून त्याने मोठ्या प्रमाणात नफा मिळवल्याचं देखील समोर येत आहे. महादेव बेटिंग हे ॲप बेकायदेशीर असून यात पैशांची मोठी गुंतवणूक करण्यात आली होती आणि यासाठी बनावट बँक खाती देखील उघडण्यात आली होती अशी माहिती समोर आली.

 

दरम्यान, सामाजिक कार्यकर्ते प्रकाश बनकर यांनी २०२३ साली तक्रार दाखल केली होती आणि त्याच्या आधारे माटुंगा येथे साहिल खान याच्यासह २१ जणांविरुद्ध गुन्हा दाखल करण्यात आला होता. यापुर्वी मिळालेल्या माहितीनुसार, मुंबई पोलिस गुन्हे शाखेने आरोपी अमित शर्मा, साहिल खान आणि त्याच्या दोन भावांना यापुर्वी देखील चौकशीसाठी बोलावण्यात आले असता कोणीही हजर राहिले नव्हते. दरम्यान, या प्रकरणात ३१ आरोपींच्या नावे एफआयरची नोंद झाली असून यापैकी बरेच जण देशात नसल्याचे समोर आले आहे. याप्रकरणी आरोपी पलायन करण्याची शक्यता लक्षात घेता पोलीस ‘लुक आउट सर्कुलर’ (एलओसी) जारी करण्याबाबत विचार करत आहेत. दरम्यान, नागपूरमध्ये झालेल्या हिवाळी अधिवेशनात उपमुख्यमंत्री देवेंद्र फडणवीस यांनी महादेव बुक बेटिंग अ‍ॅपप्रकरणाची कसून चौकशी केली जाईल असे म्हटले होते. काही दिवसांपुर्वी रणबीर कपूर, सोनाक्षी सिन्हा, श्रद्धा कपूर, हिना खान, हुमा खुरेशी यांना देखील ईडीने समन्स पाठवले होते.