सांस्कृतिक विभागातर्फे महिला दिनानिमित्त ‘उत्सव स्त्री शक्तीचा’ कार्यक्रमाचे आयोजन
Total Views |
सांस्कृतिक मंत्री सुधीर मुनगंटीवार यांच्या शुभहस्ते महोत्सवाचे होणार उद्घाटन
मुंबई : जागतिक महिला दिनानिमित्त ८ मार्च २०२४ रोजी राज्याच्या सांस्कृतिक कार्य विभाग, पु. ल. देशपांडे महाराष्ट्र कला अकादमी आणि अमर हिंद मंडळ, दादर यांच्या संयुक्त विद्यमाने ‘महिला कला महोत्सव २०२४- ‘उत्सव स्त्री शक्तीचा’ या महोत्सवाचे आयोजन करण्यात आले आहे. ८ ते १० मार्च अशा तीन दिवसीय या महोत्सवात रोज सायंकाळी विविध चर्चासत्र, मुलाखती, नृत्य, गाण्याचे कार्यक्रम, नाटक यांचे सादरीकरण केले जाणार आहे. या महोत्सवाचे उद्घाटन दादर मधील अमर हिंद मंडळ येथे सांस्कृतिक मंत्री सुधीर मुनगंटीवार (Sudhir Mungantiwar) यांच्या शुभहस्ते सायंकाळी ६ वाजता होणार आहे.
‘महिला कला महोत्सव २०२४- ‘उत्सव स्त्री शक्तीचा’ या तीन दिवसीय कार्यक्रमात दिनांक ९ मार्च २०२४ रोजी सायं ६ वाजल्यापासून ‘मिशन विश्व ममत्व फाऊंडेशन नागपूर या संस्थेचे तृतीयपंथी कलाकार ‘तू है शक्ति’ यांचा नृत्याविष्कार, शेफ मधुरा बाचल, वित्तीय सल्लागार रचना रानडे आणि वन्यजीव छायाचित्रकार ॠता कळमणकर यांची मुलाखत आणि संगीत कार्यक्रम होईल. तर १० मार्च रोजी सायं ६ वाजल्यापासून अभिराम भडकमकर लिखित ‘सीता’ या कादंबरीवर चर्चा आणि अभिवाचन लेखिका रोहिणी निनावे, अभिनेत्री व लेखिका मधुरा वेलणकर आणि लेखिका स्वरा मोकाशी करतील. त्यानंतर विदुषी देवकी पंडित यांचा ‘देवी - दिव्य शक्तींचे प्रतीक’ या संकल्पनेवरील रचना सादर होतील. दरम्यान, अमर हिंद मंडळ, दादर येथे आयोजित हा महोत्सव सर्व रसिकांसाठी खुला असून रसिकांनी या महोत्सवाचा आनंद घ्यावा, असे आवाहन सांस्कृतिक कार्य मंत्री सुधीर मुनगंटीवार यांनी केले आहे.