चंद्रपुरसारख्या दुर्गम भागात महिला शिक्षणाला चालना मिळणार!

चंद्रपूर :   चंद्रपूरसारख्या दुर्गम भागात महिलांना शिक्षणाची द्वारे खुली करण्यात आले आहे. विसापूर येथे राज्याचे मुख्यमंत्री एकनाथ शिंदे यांच्या हस्ते एसएनडीटी महिला विद्यापीठाचे भूमिपूजन करण्यात आले आहे. येथील नव्याने सुरू होणारे विद्यापीठ जिल्ह्यातील महिला व तरुणींसाठी आनंदाची बाब आहे, असेही मुख्यमंत्री शिंदे यांनी सांगितले. चंद्रपूर येथील बॉटनिकल गार्डनचे लोकार्पण, एसएनडीटी महिला विद्यापीठाच्या महर्षी कर्वे महिला सक्षमीकरण ज्ञानसंकुलाचे भूमिपूजन तसेच महानगरपालिकेच्या पाणीपुरवठा व मलनिस्सारण प्रकल्पाचे भूमिपूजन करण्यात आले आहे.

दरम्यान, चंद्रपूरला आजही ‘चांदा’ या नावाने ओळखले जाते. चंद्रपूर येथे १६६७ कोटी रुपयांच्या विविध विकास कामांचे भूमिपूजन व लोकार्पण होत असल्याने चांदाची खऱ्या अर्थाने चांदी आहे. चंद्रपूर जिल्ह्यातील विसापूर येथे नव्याने सुरू होणारे एस.एन.डी.टी. महिला विद्यापीठाचे केंद्र जिल्ह्यातील महिला व तरुणींसाठी आनंदाची बाब असल्याचे मुख्यमंत्र्यांनी सांगितले.

हे वाचलंत का? >>>   राज्यातील महाविद्यालयांत ‘आचार्य चाणक्य कौशल्य विकास केंद्र’

यावेळी राज्याचे वने सांस्कृतिक कार्य मंत्री तथा चंद्रपूरचे पालकमंत्री सुधीर मुनगंटीवार, खासदार अशोक नेते, आमदार किशोर जोरगेवार, मुख्यमंत्र्यांचे प्रधान सचिव विकास खारगे, वनविभागाचे प्रधान सचिव बी. वेणूगोपाल रेड्डी, प्रधान मुख्य वनसंरक्षक तथा वनबल प्रमुख शैलेश टेंभुर्णीकर, प्रधान मुख्य वनसंरक्षक महीप गुप्ता, एसएनडीटी महिला विद्यापीठाच्या कुलगुरू डॉ. उज्वला चक्रदेव, जिल्हाधिकारी विनय गौडा, मुख्य कार्यकारी अधिकारी विवेक जॉन्सन, डॉ.जितेंद्र रामगावकर, मनपा आयुक्त विपीन पालीवाल, विद्यापीठाच्या प्र कुलगुरू डॉ. रूबी ओझा, डॉ विलास नांदवडेकर, संचालक डॉ. राजेश इंगोले आदी उपस्थित होते.

 

मुख्यमंत्री शिंदे पुढे म्हणाले, चंद्रपूरला दूरदृष्टी असलेले सुधीरभाऊ सारखे लोकप्रतिनिधी लाभले आहे. हाती घेतलेले काम पूर्ण शक्तीनिशी करणारे ते मंत्रिमंडळातील माझे वरिष्ठ सहयोगी आहेत. गतकाळात अर्थमंत्री तसेच यावेळी वनमंत्री व सांस्कृतिक कार्य मंत्री म्हणून त्यांनी राज्यासाठी खूप मोठे काम केले आहे. त्यांच्या उपक्रमशीलतेमुळे वन खाते व सांस्कृतिक खाते बहरले आहे. आपल्या संस्कृतीची जोपासना कशी करायची, हे सांस्कृतिक कार्य विभागाने दाखवून दिले आहे. प्रत्येक विषयाची जाण असलेल्या सुधीरभाऊंनी चंद्रपूर जिल्ह्यात विकासाची गंगा आणली आहे. आता विद्यापीठ आणून यामुळे शिक्षणाची संधी जिल्ह्यातील महिलान उपलब्ध करुन देत आहे असेही मुख्यमंत्री शिंदे म्हणाले.

वाघाच्या प्रेमापोटी या व्याघ्रभूमीत राज्याचे मुख्यमंत्री एकनाथ शिंदे यांच्या हस्ते इतर लोकार्पण सोबतच एसएनडीटी महिला विद्यापीठाच्या महर्षी कर्वे महिला सक्षमीकरण ज्ञान संकुलाचे भूमिपूजन पार पडले. यामुळे जिल्ह्यातील महीलांना रोजगाराची व स्वयंरोजगाराची मोठी संधी प्राप्त होणार आहे. यामुळे कौशल्य शिक्षण मिळेल असे राज्याचे वन, सांस्कृतिक कार्य व जिल्ह्याचे पालकमंत्री सुधीर मुनगंटीवार यांनी सांगितले. विद्यापीठाला ५९० कोटी मंजूर केले म्हणून त्यांनी मुख्यमंत्र्यांचे आभार मानले.

तत्पूर्वी मान्यवरांच्या हस्ते रिमोटद्वारे चारही प्रकल्पांचे भूमिपूजन व लोकार्पण करण्यात आले. कार्यक्रमाच्या सुरुवातीला दीप प्रज्वलन करून राज्यगीताने आणि एसएनडीटी विद्यापीठ गीताने कार्यक्रमाची सुरुवात करण्यात आली. कार्यक्रमाचे प्रास्तावित जिल्हाधिकारी विनय गौडा यांनी केले तर आभार विद्यापीठाचे कुलसचिव डॉ. विलास नांदवडेकर यांनी मानले.