पेटीएम पेमेंट बँकाचे खातेदार असाल तर हे नक्की वाचा….

मुंबई:रिझर्व्ह बँकेने पेटीएम पेमेंट बँकेच्या व्यवहार स्थगितीला पुढे ढकलले आहे. आरबीआयकडून या संदर्भात सूचनाही जारी करण्यात आलेली आहे. वन ९७ कम्युनिकेशनस मालकीच्या पेटीएम पेमेंट बँकेवर कारवाईत कुठलीही सवलत आरबीआयकडून देण्यात आलेली नाही. केवळ व्यवहार, देवाणघेवाणीची मुदत १५ मार्चपर्यंत वाढवण्यात आलेली आहे. त्यामुळे ग्राहकांचा संभ्रम दूर करण्यासाठी आरबीआयने प्रश्न उत्तर (एफ ए क्यू) प्रसिद्ध केले आहे. यात सांगितल्याप्रमाणे यापुढे पेटीएम पेमेंट बँकेच्या खात्यात कुठलाही पैसा जमा करण्यास आरबीआयने मज्जाव केला आहे. यानुसार कुठलीही नवी ठेव, कुठल्याही बँकेचे खाते जोडण्यास अथवा फूड वॉलेट, फास्टटॅग इत्यादी सुविधा पेटीएम पेमेंट बँकेत वापरता येणार नाही.

 

 

भविष्यात या पेटीएम बँकेवर निर्बंध असले तरी पेटीएममधून युपीआयच्या माध्यमातून दैनंदिन व्यवहार करता येणार आहेत. या पेटीएम बँकेत व्याज दर,कॅशबॅक , परतफेड अशा अपवादात्मक सेवा वगळता कुठल्याही प्रकारची थेट रक्कम ज्यामध्ये पगार, सबसिडी जमा होणार नाही.

 

यावर पेटीएम कंपनीचे अधिकृत प्रवक्ते यांनी प्रसारमाध्यमांना प्रतिक्रिया दिली आहे. ते म्हणाले,'आम्‍ही अनुपालन व नियामक मार्गदर्शकतत्त्वांवर लक्ष केंद्रित करत आमच्‍या व्‍यापारी सहयोगींना विनासायास सेवा देण्‍याप्रती कटिबद्ध आहोत. आम्‍ही आमच्‍या वापरकर्त्‍यांना आश्‍वासन देतो की, पेटीएम अॅप आणि आमचे अग्रणी डिवाईसेस जसे पेटीएम क्‍यूआर, साऊंडबॉक्‍स, कार्ड मशिन नेहमीप्रमाणे पुढे देखील कार्यरत राहतील. नोडल खाते अॅक्सिस बँकेत (एस्क्रो खाते उघडून) हस्‍तांतरित करण्‍यामधून पूर्वीप्रमाणे मर्चंट सेटलमेंट सुरू राहण्‍याची खात्री मिळेल. आम्‍ही देशाच्‍या आर्थिक समावेशन प्रवासामध्‍ये मोठ्या प्रमाणात योगदान देणा-या भारतींयाना सक्षम करत राहण्‍याचा प्रयत्‍न करतो.'