महापरिनिर्वाण दिनासाठी चैत्यभूमी सज्ज! कोकण विभागीय आयुक्तांकडून सोयीसुविधांची पाहणी

 

 

मुंबई : भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त चैत्यभूमीवरील सुविधांचा कोकण विभागीय आयुक्त डॉ. राजेश देशमुख यांनी आढावा घेतला. बाबासाहेबांच्या महापरिनिर्वाण दिनानिमित्त देशभरातून लाखों अनुयायी दादरच्या चैत्यभूमीवर त्यांना अभिवादन करण्यासाठी येत असतात. दरम्यान, त्यांच्यासाठी प्रशासनामार्फत विविध सोयीसुविधा केल्या जातात. डॉ. देशमुख यांच्यामार्फत या कामांची पाहणी करण्यात आली.

 

यावेळी कोकण विभागीय अतिरिक्त आयुक्त विवेक गायकवाड, बृहन्मुंबई महानगरपालिकेचे सहायक आयुक्त अजितकुमार आंबी, सहायक पोलीस आयुक्त प्रवीण तेजाळे, डॉ. बाबासाहेब आंबेडकर यांचे नातू भीमराव आंबेडकर, डॉ. बाबासाहेब आंबेडकर महापरिनिर्वाण दिन समन्वय समितीचे सरचिटणीस नागसेन कांबळे, समन्वय समितीचे उपाध्यक्ष महेंद्र साळवे यांच्यासह संबंधित अधिकारी उपस्थित होते. यावेळी सर्व मान्यवरांनी डॉ. बाबासाहेब आंबेडकरांना अभिवादन केले. तसेच चैत्यभूमी येथे दाखल झालेल्या अनुयायांना खाद्य पदार्थांच्या किटचे वाटपही करण्यात आले.

 

 

याप्रसंगी बोलताना विभागीय आयुक्त डॉ. राजेश देशमुख म्हणाले की, "चैत्यभूमीवर येणाऱ्या अनुयायांसाठी भोजनाची व्यवस्था करण्यात येत आहे. तसेच त्यांच्यासाठी वैद्यकीय कक्षही उभारण्यात येतो. छत्रपती शिवाजी महाराज मैदान (शिवाजी पार्क) आणि परिसरात पुरविण्यात येणाऱ्या नागरी सेवा-सुविधांबाबत सर्व यंत्रणांनी सूक्ष्म नियोजन करत समन्‍वय साधून कार्यवाही करावी. तसेच उपलब्ध करून देण्यात आलेल्या सुविधा अनुयायांना मिळतात की, नाही याची खात्री करावी," असे निर्देश त्यांनी दिले.