सायबर सुरक्षेची विस्तारणारी कक्षा

त्यानुसार, या क्षेत्रात कार्यरत संस्थांनी ९० टक्के सायबर हल्ल्यांचा धोका हा ई-मेलच्या, ८४ टक्के ‘फिशिंग’च्या (विविध इलेक्ट्रॉनिक/ऑनलाईन माध्यमातून प्रलोभने दाखवून होणारी फसवणूक) स्वरुपात होत असल्याचेही अधोरेखित केले आहे. आधी म्हटल्याप्रमाणे, या बाजारपेठेचा वेगाने विस्तार होत असल्यामुळे, या क्षेत्रात मनुष्यबळाच्या समस्येनेही तितकेच गंभीर स्वरूप धारण केल्याचे दिसते. या अहवालानुसार, ७५ टक्के सर्वेक्षण केलेल्या संस्थांनी त्यांच्याकडे कुशल मनुष्यबळाची टंचाई असल्याचे कबूल केले. यावरून या क्षेत्राला भेडसावणार्‍या कुशल मनुष्यबळ संबंधीच्या आव्हानांचा अंदाज यावा. आता सायबर सुरक्षेचा सर्वाधिक वापर हा सामान्य नागरिकांतर्फे म्हणावा तितक्या प्रमाणात अजूनही होताना दिसत नाही. त्यामुळे या क्षेत्रातील अग्रगण्य ग्राहक म्हणजे (बी टू बी) म्हणजे बँका, आर्थिक व्यवहार करणार्‍या संस्था, इन्शुरन्स कंपन्या. त्याखालोखाल आयटी क्षेत्रातील कंपन्यांनाही सायबर सुरक्षा सेवासुविधांचा लाभ घेण्यासाठी गत्यंतर नाहीच. तसेच सायबर सुरक्षा जगतातील कंपन्यांनी कोणत्या क्षेत्रात गुंतवणूूक केली आहे, असा प्रश्न केला असता, यापैकी ९७ टक्के कंपन्यांनी आर्टिफिशियल इंटेलिजन्स, मशिन लर्निंग, तर ८४ टक्के कंपन्यांनी क्लाऊड तंत्रज्ञानात गुंतवणूक केल्याचे स्पष्ट केले. यावरून या क्षेत्रातील कंपन्यांचा गुंतवणूक कलही नवतंत्रज्ञानाकडे असल्याची बाब अधोरेखित होते.