आयुष्यमानच्या ‘ड्रीम गर्ल २’ची बॉक्स ऑफिसवर पहिल्याच दिवशी १० कोटींच्या घरात ओपनिंग

 

 

 

 

 

मुंबई : गेल्या काही काळापासून बॉक्स ऑफिसवर बॅकफुटला गेलेल्या हिंदी चित्रपटांना पुन्हा उभारी आली आहे असे चित्र दिसून येत आहे. नुकताच गदर २ या चित्रपटाने हिंदी चित्रपटसृष्टीच्या इतिहासात ४०० कोटींच्या पुढे कमाई नाव कोरले. याशिवाय ओएमजी २ या चित्रपटानेही अनेक चढ उतारांचा सामना करत चांगली कमाई केली आहे. यानंतर आता २५ ऑगस्ट रोजी प्रदर्शित झालेल्या ड्रीम गर्ल २ चित्रपटानेही बॉक्स ऑफिसवर चांगली कमाई केली आहे. २०१९ साली प्रदर्शित झालेल्या ‘ड्रीम गर्ल’चा हा सीक्वेल आहे. अभिनेता आयुष्मान खुरानाच्या या विनोदी चित्रपटाने प्रेक्षकांना आधी लोटपोट हसवलं होतंच. त्यामुळेच ड्रीम गर्ल २ कडूनही प्रेक्षकांना अपेक्षा होत्या. आणि त्याच अपेक्षांना चित्रपट खरा उतरला असून चित्रपटाने चित्रपटाने पहिल्या दिवशी १०.६९ कोटींची कमाई केली आहे.

 

‘ड्रीम गर्ल २’ बॉक्स ऑफिसवरील इतर चित्रपटांना तगडी टक्कर देत असल्याचं पाहायला मिळत आहे. या चित्रपटाच्या पहिल्या दिवसाच्या बॉक्स ऑफिस कलेक्शनचे आकडे समोर आले आहेत. आयुष्यमान खुरानाचे या आधीचे अनेक चित्रपट फ्लॉप ठरल्यानंतर ड्रीम गर्ल २ ने या वर्षाची चांगली ओपनिंग केली आहे. आयुष्मान खुरानाच्या ‘ड्रीम गर्ल’ या चित्रपटानेही पहिल्या दिवशी १० कोटींच्या आसपास कमाई केली होती. पण, तरीही चित्रपट बॉक्स ऑफिसवर सुपरहिट ठरला होता. ‘ड्रीम गर्ल’ने बॉक्स ऑफिसवर एकूण १४२ कोटींचा गल्ला जमवला होता. दरम्यान, आयुष्मानच्या करिअरमधील हा सगळ्यात जास्त कमाई करणारा चित्रपट ठरला होता. आयुष्मान खुरानाबरोबरच ‘ड्रीम गर्ल २’मध्ये बॉलिवूड अभिनेत्री अनन्या पांडे मुख्य भूमिकेत आहे. या चित्रपटात परेश रावल, विजय राज, राजपाल यादव, अन्नू कपूर, अभिषेक बॅनर्जी या कलाकारांच्याही महत्त्वाच्या भूमिका आहेत.