केईएम रुग्णालयाच्या सहा वार्डचे बांधकाम युद्धपातळीवर पूर्ण करा - मुख्यमंत्री एकनाथ शिंदे

मुंबई : मुख्यमंत्री एकनाथ शिंदे यांनी केईएम रुग्णालयाच्या सहा वार्डचे बांधकाम युद्धपातळीवर पूर्ण करण्यात यावे असे निर्देश दिले आहे. त्यांनी अचानक केईएम रुग्णालयाला भेट देत तेथील रुग्णांची विचारपूस केली. त्यानंतर माध्यमांशी संवाद साधत असाताना त्यांनी याबद्दल माहिती दिली.

 

मुख्यमंत्री एकनाथ शिंदे यांनी केईएम रुग्णालयाला अचानक भेट देऊन रुग्णांची विचारपूस केली. तसेच रुग्णालयातील विविध विभागांना भेट देऊन तेथील व्यवस्थेची माहितीही घेतली. यावेळी मुंबई महापालिकेचे अतिरिक्त आयुक्त डॉ. सुधाकर शिंदे, रुग्णालयाच्या अधिष्ठाता डॉ. संगीता रावत यांच्यासह विविध विभागांचे वरिष्ठ अधिकारी आदी उपस्थित होते.

 

केईएम येत्या दोन-तीन वर्षात शंभर वर्षे पूर्ण करत आहे. त्यामुळे या रुग्णालयातील रुग्णसेवा, येथील सुविधा आणखी आधुनिक करण्याच्यादृष्टीने प्रस्ताव सादर करण्याचेही निर्देश मुख्यमंत्र्यांनी अधिकाऱ्यांना यावेळी दिले. तसेच रुग्णालयातील सामान्य विभागासह अतिदक्षता विभागात उपचार घेणाऱ्या रुग्णांशी संवाद साधून त्यांना मिळत असलेल्या उपचारांची माहितीही मुख्यमंत्र्यांनी घेतली.

 

मुख्यमंत्र्यांनी केईएम रुग्णालयातील रुग्णांशी संवाद साधत त्यांच्या अडचणी जाणून घेतल्या. तसेच त्यांनी विविध वार्ड आणि तेथील सुविधांबाबतही माहितीही घेतली. यावेळी बोलताना ते म्हणाले की, रुग्णालयातील सहा वार्डचे काम येत्या दोन दिवसांत सुरू करण्याचे निर्देश दिले आहेत. महापालिकेच्या वरिष्ठ अधिकाऱ्यांनी लक्ष घालून हे काम युद्धपातळीवर पूर्ण करण्याच्या सूचना दिल्या आहेत. जेणेकरून याठिकाणी आणखी ४०० ते ४५० रुग्णांवर उपचार करता येणार आहेत.

 

तसेच काही रुग्णांनी आर्थिक अडचणीची माहिती दिली. त्यावर पैश्याअभावी कुणाचेही उपचार थांबणार नाहीत याची दक्षता घेण्याचे सांगण्यात आले आहे. याठिकाणी रुग्णांना दर्जेदार दूध पुरवण्यात यावे याबाबतही सूचना देण्यात आल्या असल्याचे मुख्यमंत्र्यांनी सांगितले.