विष्णुदास भावे नाट्यगृह येथे वाचनालय बांधण्याच्या कामास प्रारंभ

नवी मुंबई : नाट्य रसिकांची मागणी लक्षात घेता वाशी मधील विष्णुदास भावे नाट्यगृहाच्या इमारतीमध्ये वाचनालय बांधण्याचा निर्णय नवी मुंबई महानगरपालिकेचे आयुक्त राजेश नार्वेकर यांनी घेतला आहे, अशी माहिती शहर अभियंता संजय देसाई यांनी दिली. त्यानुसार वाचनालय निर्मितीचे काम चालू करण्यात आले आहे. त्यामुळे लवकरच सांस्कृतिक वारसा असलेल्या महानगरपालिकेच्या या वास्तूत नाट्यप्रेमींसह सर्व पुस्तकप्रेमींना सुसज्य असे वाचनालय उपलब्ध होणार आहे. हे वाचनालय उभारण्याकरिता ३ कोटी ६५ लाख १४ हजार रुपये खर्च येणार आहे.

वाशी विभागात विष्णुदास भावे नाटयगृह हे नवी मुंबई महानगरपालिका क्षेत्रात एकमेव नाटयगृह आहे. या नाटयगृहात नवी मुंबई मधील विविध ठिकाणावरून नागरिक नाटकाचे प्रयोग बघण्यासाठी येतात. तसेच सदरचे ठिकाण हे वाशी क्षेत्रातील मध्यवर्ती ठिकाण असल्याने मोठ्या प्रमाणात नागरिकांची वर्दळ असते. नवी मुंबईतील नागरिकांचा वाचनाचा छंद जोपासण्याकरिता या इमारतीत अद्यावत वाचनालय बांधण्याचे काम प्रगतीपथावर आहे. विष्णुदास भावे नाटयगृह सिडकोकडून १३ मे १९९७ ला नवी मुंबई महानगरपालिकेकडे हस्तांतर करण्यात आले आहे.

नाट्यगृहातील आसन क्षमता तळमजला ७४३ व बाल्कनी २५८ असे एकूण १००१ आसन इतकी आहे. अनेकदा नाटक किंवा अन्य संस्कृती कार्यक्रम चालू होण्यापूर्वी तसेच संपल्यानंतर अनेक रसिक या नाट्यगृहाच्या परिसरामध्ये काही वेळ असतात. त्या वेळी वाचनाची गोडी असलेल्यांना वाचनाकरिता विविध ग्रंथ आणि अन्य साहित्य उपलब्ध व्हावे अशी अनेक रसिकांची मागणी होती. याची नोंद घेत महानगरपालिकेचे आयुक्त राजेश नार्वेकर यांनी हे वाचनालय उभारण्याचे आदेश दिले. हे वाचनालय उभारण्याचे काम मे. ए. व्ही. कन्स्ट्रक्शन यांना देण्यात आले आहे. २३ नोव्हेंबर पर्यंत काम पूर्ण करण्याची तारीख असून वाचनालयाचे क्षेत्रफळ १७१ चौ.मी. इतके आहे. वाचनालयात आसन क्षमता २५ असणार आहे. वाचनालयाकरीता टेबल, खुर्च्या व बुक शेल्वस पुरविणे, ग्रेनाईट, वूडन फ्लोरींग करणे, ग्लास ग्लेझींग बसविणे, साऊंड सिस्टीम बसविणे, फायर अर्लाम सिस्टीम बसविणे, रंगकाम करणे, विद्युत विषयक कामे करण्यात येणार आहेत.