बँकेच्या शिपायाचा विश्वविक्रम...

ठाणे : सांगलीच्या अवलियाने ठाण्यात विश्वविक्रम केला आहे. पंडित तुकाराम धायगुडे (४३) असे त्यांचे नाव असून ते ठाणे जिल्हा बँकेत शिपाई आहेत. त्यांनी २५७ किलो वजनाच्या सहा दुचाकी ३७७ वेळा चक्क पोटावरून नेण्याचा विश्वविक्रम केला आहे. यापूर्वीही १२२ वेळा पोटावरून दुचाकी नेऊन धायगुडे यांनी ‘गिनिज बुक ऑफ वर्ल्ड रेकॉर्ड’ नोंदवला होता. रविवारी ठाणे पूर्वेकडील धर्मवीर क्रीडासंकुलात धायगुडे यांनी आपलाच हा विश्वविक्रम मोडून नवा विक्रम स्थापित केला आहे. या विश्वविक्रमी कामगिरीमुळे धायगुडे यांच्यावर कौतुकाचा वर्षाव होत आहे.

ठाणे जिल्हा बँकेत शिपाईपदी कार्यरत असलेले धायगुडे यांनी कराटेत ‘ब्लॅक बेल्ट’ मिळवला आहे. काही तरी जगावेगळे करण्याच्या ध्यासातून धायगुडे २००९ पासून तयारी करीत होते. याआधी २०१६ साली त्यांनी २५७ किलो वजनाच्या दोन दुचाकी लागोपाठ १२२ वेळा आपल्या पोटावरून नेत विश्वविक्रमाला गवसणी घातली होती. रविवारी त्यांनी आपलाच विक्रम मोडीत काढत २५७ किलो वजनाच्या सहा दुचाकी लागोपाठ ३७७ वेळा आपल्या पोटावरून नेऊन विश्वविक्रम केला. खरं तर, १५० वेळा या बाईक पोटावरून जाण्याची तयारी धायगुडे यांनी केली होती. पण, त्रिशतक होता-होता सहा दुचाकी त्यांनी तब्बल ३७७ वेळा त्यांच्या पोटावरून नेल्या.

 

३७७व्या खेपेला ‘इंडियाज स्कॉट’ची तब्बल ४५० किलो वजनाची गाडी धायगुडेंच्या अंगावरून गेली आणि एकच जल्लोष झाला. प्रारंभी धायगुडे यांनी एका मिनिटात १०५ साईड सीटअप्सचा देखील विश्वविक्रम केला. यापूर्वीचा रेकॉर्ड ६५ सीटअपस्चा होता. या कार्यक्रमाला आ. संजय केळकर, माजी आ. रवींद्र फाटक, ‘आयआरएस’ नितीन वाघमोडे, पोलीस अधीक्षक विक्रम देशमाने, राष्ट्रीय धावपटू ललिता बाबर, कस्टम ऑफिसर संदीप भोसले, ज्येष्ठ वकील नानासाहेब मोटे, ठाणे जिल्हा बँकेचे संचालक बाबाजी पाटील, प्राध्यापक दत्ताजी डांगे, डॉ. मनोज माने, डॉ. अरुण गावडे, प्रशिक्षक गणेश मरगजे, मणी गौडा, ‘धनगर प्रतिष्ठान’चे अध्यक्ष दीपक कुरकुंडे आदी मान्यवर उपस्थित होते.