वज्रप्रश्न असाही...

पुणे, नाशिक आणि कोल्हापूर येथे होणार्‍या मविआच्या तीन वज्रमूठ सभा पुढे ढकलण्यात आल्या आहेत. राष्ट्रवादी काँग्रेसचे नेते आणि उद्धव ठाकरे म्हणतात की, ऊन खूप आहे. उन्हाचा जोर ओसरला की, सभा घेतल्या जातील. पण, याआधी मुंबईत आणि ठाण्यातपण ऊन होतेच, तरीसुद्धा वज्रमूठ सभा झालीच. मग तशाच प्रकारे पुणे, कोल्हापूर, नाशिकमध्ये या सभा होऊ शकल्या असत्या. पण, आता वज्रमुठीची झाकली मूठ सव्वालाखाची झाली आहे. छे छे काही लोकांच्या मते, झाकली मूठ बिनकामाची असे झाले आहे. या सभा का पुढे ढकलल्या गेल्या? त्या होणार तरी आहेत का? असा प्रश्न काही लोकांना पडला आहे. कारण, राष्ट्रवादी काँग्रेसचे सर्वेसर्वा शरद पवारांनी दिलेल्या अध्यक्षपदाच्या राजीनाम्याचा सस्पेन्स अद्याप कायम आहे. त्या राजीनाम्यानंतरचे नाट्य सगळ्यांनीच पाहिले. शरद पवारांच्या वरदहस्तावर यथेच्छ सत्ता उपभोगणारे नेते रडत होते, भेकत होते. शरद पवार समोर बसलेले असतानाही काही अभद्र घडले आहे, असे वागत होते. नाही म्हणायला अजित पवार आणि प्रफुल्ल पटेल हे दोघेही उपस्थितांना थार्‍यावर आणत होते. असो. एकच वादा अजितदादा. पुढे तिथे कुणाचे काही चाललेले दिसले नाही. मात्र, यापुढे महाविकास आघाडीची वज्रमूठ वज्र राहील की, वज्रमूठेला नेता-कार्यकर्ता गळतीची छिद्र पडतील, याबद्दल कुणालाच काही माहिती नाही. नेत्या आणि छोट्या-मोठ्या पदासाठी उभ्या आयुष्याचे राजकारण बनवणार्‍या पदाधिकारी आणि कार्यकर्तांची कारकिर्द पाहता वज्रमूठ आणि त्यातल्या सहभागी राजकीय पक्षाचे काय होणार, यावर प्रश्नचिन्ह आहे. त्यामुळे वज्रमूठ सभेचे काय घेऊन बसलात, मविआचे काय होणार, हे बघा असेही काही लोक म्हणत आहेत, तर काही लोक म्हणतात, उन्हातान्हाची काहीली झाल्यानंतर वज्रमूठसभेत वांद्य्राच्या साहेबांचे भाषण ऐकून कसे मनोरंजन होत होते. ‘चीनला ‘ईडी’ लावा’ हे साहेबांचे मनोगत ऐकून किती किती कल्पना मनात आल्या होत्या. चीन भारतात आहे आणि भाजपचे राज्य आहे. मग भाजपचे मोदी-शाह कटकारस्थान करणार्‍या चीनविरोधात कारवाई करतो वगैरे वगैरे. पण, आता वज्रमूठ सभाच होणार नाही, तर आम्ही सामान्य लोकांनी मनसोक्त मनोरंजनासाठी कुठे जायचे, काय करायचे? हा त्यांना वज्रप्रश्न पडला आहे.