गो फर्स्ट विमान सेवा दिवाळखोरीत जाणार का? काय आहे कारण ?

नवी दिल्ली : सध्या हवाई प्रवासी चिंतेत आहेत. विमानतळावरील गो फर्स्ट काउंटरवर शांतता आहे. या सगळ्याचे कारण म्हणजे वाडिया समूहाच्या गो फर्स्ट या विमान कंपनीने पुढील काही दिवस आपले विमानसेवा बंद ठेवण्याची घोषणा केली आहे. मात्र या कंपनीची अवस्था पाहता हे संकट काही दिवसांचे आहे असे वाटत नाही. खरं तर GoFirst दिवाळखोरीच्या मार्गावर आहे. नॅशनल कंपनी लॉ ट्रिब्युनल (NCLT) मध्ये ऐच्छिक दिवाळखोरी कार्यवाहीसाठी अर्ज केला आहे.

या विमान कंपनीकडे ना इंधन आहे ना पैसा. हे लक्षात घेऊन GoFirst ने ३ मे ते ५ मे पर्यत सर्व उड्डाणे रद्द करण्याचा निर्णय घेतला आहे. .यासंदर्भात कंपनीने दि. २ मे रोजी ट्विट केले होते. त्यात कंपनीने सांगितले की,  "तांत्रिक कारणामुळे ३ ते ५ मे २०२३ पर्यत गो फर्स्ट फ्लाइट्स रद्द करण्यात आल्या आहेत. यासाठी आम्ही आमच्या ग्राहकांची माफी मागतो. अधिक माहितीसाठी कृपया https://bit.ly/42ab9la ला भेट द्या. आम्ही खात्री देतो की तुम्ही अधिक माहितीसह लवकरच परत याल.”

एका वृत्तानुसार ,आर्थिक संकटाचा सामना करत असलेली गो फर्स्ट एअरलाइन्स दिवाळखोरीच्या उंबरठ्यावर पोहोचली आहे. विमान कंपनीच्या रोख रक्कमेवर मोठा परिणाम झाला आहे. त्यांच्याकडे ना तेल आहे ना तेल कंपन्यांची थकबाकी भरण्यासाठी पैसे.पंरतू या सर्व प्रकरणावर कंपनीचे म्हणणे आहे की ,इंजिनची कमतरता आहे, ज्यामुळे ते कमी उड्डाण करू शकतील. इंजिन बनवणाऱ्या प्रॅट अँड व्हिटनी या अमेरिकन कंपनीने त्याचा पुरवठा बंद केला आहे.

 

GoFirst एअरलाइनने सांगितले की ,त्यांना यूएस-आधारित P&W इंटरनॅशनल एरो इंजिन्स (Pratt & Whitney's International Aero Engines) कडून पुरवठ्यामध्ये समस्या येत आहेत. P&W ला २७ एप्रिल २०२३ पर्यंत किमान १० स्पेअर लीज इंजिने आणि १० अतिरिक्त इंजिने देण्यास सांगितले होते. मात्र त्याने तसे केले नाही, त्यामुळे त्यांच्या कमाईवर परिणाम झाला आहे. अयशस्वी इंजिनांच्या वाढत्या संख्येने त्यांना उड्डाण थांबवण्यास भाग पाडले, असे कंपनीचे म्हणणे आहे.

कंपनीने पुढे म्हटले आहे की ,P&W विमानाच्या इंजिनांची दुरुस्ती करण्यात आणि भाग प्रदान करण्यात अयशस्वी ठरले आहे, ज्यामुळे त्यांच्या ५० टक्के विमानांचे ग्राउंडिंग झाले आहे. प्रॅट अँड व्हिटनीच्या सदोष इंजिनांमुळे ग्राउंड केलेल्या विमानांची टक्केवारी डिसेंबर २०१९ मध्ये ७ टक्क्यांवरून डिसेंबर २०२० मध्ये ३१ टक्के आणि डिसेंबर २०२२ मध्ये ५० टक्क्यापर्यंत वाढवली आहे. GoFirst ने सांगितले की त्यांनी सरकारला त्यांच्या स्थितीबद्दल माहिती दिली आहे आणि नियामक डायरेक्टरेट जनरल ऑफ सिव्हिल एव्हिएशन (DGCA) कडे अहवाल पाठवला जाईल. एअरलाइनच्या ताफ्यात सध्या ५९ विमाने आहेत. त्यापैकी ५४A३२0NEO आणि पाच A३२०CEO आहेत.

त्याचवेळी नागरी विमान वाहतूक मंत्री ज्योतिरादित्य सिंधिया यांनी सांगितले की, या विमान कंपनीला वाचवण्याचा प्रयत्न करू. ते म्हणाले की GoFirst इंजिन पुरवठ्याशी संबंधित समस्यांना तोंड देत आहे. या प्रकरणी सरकार विमान कंपनीला सर्वतोपरी मदत करत आहे. GoFirst नुसार, P&W ने इंजिन पुरवठा पूर्ण केल्यास, एअरलाइन पुन्हा एकदा ऑगस्ट-सप्टेंबर २०२३ पर्यंत पूर्ण ऑपरेशन्सवर परत येईल.

या संकटाच्या काळात आणखी एक विमान कंपनी स्पाइसजेटने मोठा निर्णय घेतला आहे.ते २५ ग्राउंड केलेले विमान पुन्हा सुरू करणार आहे. विमानाचा हा निष्क्रिय ताफा पुन्हा सुरू करण्यासाठी कंपनीने सुमारे ४०० कोटी रुपये मिळवले आहेत. पुनरुज्जीवनासाठी सरकारच्या इमर्जन्सी क्रेडिट लाइन हमी योजनेचा लाभ घेण्याचीही योजना आहे. स्पाइसजेटला यातून आपला महसूल वाढण्याची अपेक्षा आहे.