समाजाच्या उत्कर्षासाठी सदैव सोबत असेन

आज आपल्याकडे प्रचंड ताकदीची माणसे आहेत. आपल्याकडे सगळे काही आहे फक्त इच्छाशक्ती, मेहनत पाहिजे. जेव्हा जेव्हा मराठा समाजाचे विषय होते तेव्हा पडद्यामागे मदत करणारा मी होतो. पीएसआयचा प्रश्न होता. सिलेक्शन होऊनही त्या तरुणांना कामावर घेतले नव्हते. उपमुख्यमंत्री देवेंद्र फडणवीस यांच्याकडून तो प्रश्न मार्गी लावला. केवळ मेळावे, मोर्चे घेऊन चालणार नाही तर कृतीतून काम केले पाहिजे. मराठा समाजाच्या को ऑपरेटिव्ह बँका आहेत त्या सर्व बंद पडताहेत. आम्ही नेते काय करत आहोत. मी स्वतः रायगड बँक घेतली. कारण महाराजांचा फोटो असणारी ती बँक होती. मराठा समाजातील लोकांनी एकत्रित केलेली बँक जेव्हा बंद होते तेव्हा मराठा समाजाचा कोणतातरी नेता पुढे आला पाहिजे ना? या बँकेला पुनर्जिवीत केले पाहिजे, माझ्या समाजाची बँक आहे, समाजाला ताकद देणारी बँक आहे. चुका, दोष हे दुरुस्त करता येतात. पण आपल्या या संस्था जगल्या पाहिजेत, नेते जगले पाहिजेत हा प्रयत्न झाला पाहिजे. नेत्यांनीही समाजाप्रती योगदान दिले पाहिजे.

 मराठा संघटनेला कुणी चालवू शकत नाही ती स्वयंचलित आहे. समाजाला मदत करायला अनेक नेते आहेत. पण राजकीय स्वार्थापोटी आमच्या संघटना कोण चालवत असतील तर हे चित्र विदारक आहे. ज्यावेळेला आंदोलने झाली, लाखोचे मुकमोर्चे शांततेने निघाले. हे मोर्चे का निघाले तर आपल्यावर जो अन्याय होत होता त्याचा उद्रेक बाहेर येत होता. कुठल्या नेत्याचे कर्तृत्व नव्हते. अखिल भारतीय मराठा महासंघ ही संघटना जुनी आहे. तुम्हाला लागेल ती ताकद उभी करू. पण याचे प्रॉपर प्लानिंग करून आपण पुढे गेले पाहिजे. निष्ठेने झोकून देणारे कार्यकर्ते आपल्याकडे तयार होणार नाहीत तोवर आपले संघटन मोठे होणार नाही व त्या संघटनेच्या माध्यमातून आपल्याला कुठल्याही प्रकारचे काम पुढे घेऊन जाता येणार नाही, असेही दरेकर म्हणाले.

यावेळी दरेकर यांनी आपल्या भाषणात ठाकरे गटाचे प्रमुख उद्धव ठाकरे यांना कोपरखळी लागावली. ते म्हणाले की, टोमणे बिमणे मारून काय होते हे बघितलेतना एकदम सत्ताच जाते. त्यामुळे टोमणे मारून फायदा नाही नुकसान आहे एवढे लक्षात ठेवा. चांगल्याला चांगले म्हणण्याची दानत ठेवली पाहिजे.