चैत्यभूमीला येणाऱ्या अनुयायांना आवश्यक सुविधा पुरविण्याचे मुख्यमंत्र्यांचे निर्देश!

 

 

 

मुंबई : महामानव डॉ. बाबासाहेब आंबेडकर यांच्या जयंतीनिमित्त राज्यपाल रमेश बैस, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडून चैत्यभूमीवर बाबासाहेबांना अभिवादन करण्यात आले. यावेळी त्यांनी इंदू मिल स्मारकाच्या कामाचा आढावाही घेतला.

 

जयंतीनिमित्त चैत्यभूमी येथे मोठ्या संख्येने येणाऱ्या अनुयायींना आवश्यक त्या सोयी सुविधा पुरविण्याचे निर्देश मुंबई महानगरपालिकेला देण्यात आले आहेत, अशी माहिती मुख्यमंत्री शिंदे यांनी दिली. महामानव डॉ. बाबासाहेब आंबेडकर यांच्या जयंतीच्या पार्श्वभूमीवर मुख्यमंत्री शिंदे यांनी दादर येथील चैत्यभूमी येथे भेट देऊन पाहणी केली. त्यावेळी मुख्यमंत्री शिंदे बोलत होते. यावेळी महिला व बालविकास मंत्री मंगल प्रभात लोढा, खासदार राहुल शेवाळे, आमदार सदा सरवणकर, मुंबई महानगरपालिकेचे वरिष्ठ अधिकारी उपस्थित होते.

 

चैत्यभूमीवर मोठ्या संख्येने अनुयायी येतात. या पार्श्वभूमीवर सूचना देण्यात आल्या. तसेच इंदू मिल येथे साकारण्यात येणाऱ्या स्मारकाच्या कामाला गती देण्याचे निर्देशही दिले आहेत. जागतिक दर्जाचे स्मारक तयार होईल, असेही मुख्यमंत्र्यांनी सांगितले.