राहुल गांधींपुढे दोषमुक्त होणे हाच पर्याय

 

‘सर्व चोरांचे आडनाव मोदीच’ असे वादग्रस्त वक्तव्य २०१९ साली एका जाहीरसभेत राहुल गांधी यांनी केले होते. त्याविरोधात सुरतमधील न्यायालयात सर्वेश मोदी यांनी मानहानीचा खटला दाखल केला होता. त्यानंतर गुरुवारी न्यायालयाने राहुल गांधी यांना दोषी ठरवून त्यांना दोन वर्षांच्या तुरुंगवासाची शिक्षा सुनावली आहे.त्यानंतर राहुल गांधी यांचे सदस्यत्व रद्द करण्याची नोटीस लोकसभा सचिवालयाने जारी केली आहे. सुरतच्या मुख्य न्यायदंडाधिकारी यांच्या न्यायालयात झालेल्या मानहानीच्या प्रकरणात राहुल गांधी यांना दोन वर्षांची शिक्षा सुनावण्यात आल्याचे लोकसभा सचिवालयाने अधिसूचनेत म्हटले आहे.अशा परिस्थितीत केरळमधील वायनाडचे खासदार राहुल गांधी यांचे संसद सदस्यत्व दि. २३ मार्चपासून संपुष्टात येत आहे. अधिसूचनेत हा निर्णय ‘लोकप्रतिनिधी कायदा, १९५१’च्या संविधान ‘कलम १०२ (१) (ई) च्या कलम ८’ अंतर्गत घेण्यात आला आहे.