वारकरी संप्रदायाकडून मावळत्या राज्यपालांचा गौरव

मुंबई : महाराष्ट्राचे मावळते राज्यपाल भगतसिंह कोश्यारी यांच्या जागी रमेश बैस यांची महाराष्ट्राच्या राज्यपाल पदी नियुक्ती करण्यात आली आहे. त्या पार्श्वभूमीवर राज्यातील वारकरी संप्रदायासह अनेकविध संघटनांकडून बुधवार, दि. १५ फेब्रुवारी रोजी मावळते राज्यपाल भगतसिंह कोश्यारी यांचा सन्मान करण्यात आला. यावेळी माजी राज्यमंत्री अमरजित मिश्रा, भाजपचे मुंबई सचिव सचिन शिंदे यांच्या प्रयत्नाने वारकरी संप्रदाय, भाजपा मुंबई उत्तराखंड सेल'च्या वतीने पंढरीच्या विठुरायाची मूर्ती देऊन करण्यात आला. वारकरी संप्रदायासह विविध संघटनांच्या पदाधिकारी आणि ज्येष्ठ मंडळींनी बुधवारी राजभवनात जाऊन राज्यपालांची भेट घेत त्यांना सन्मानित केले.

 

माजी राज्यमंत्री अमरजित मिश्रा म्हणाले की, ''छत्रपती शिवाजी महाराजांप्रती कृतज्ञता व्यक्त करण्यासाठी माजी राज्यपाल भगतसिंह कोश्यारी यांनी या वयातही शिवनेरी किल्ल्यावर पायी जाण्याचा जो आदर्श ठेवला होता, तो अविस्मरणीय आहे. आदिवासींच्या समस्यांचा बारकाईने अभ्यास करता यावा यासाठी त्यांनी हेलिकॉप्टरऐवजी मोटारीने पालघरच्या आदिवासी भागात पोहोचण्याचे धाडस केले. तसेच नक्षलवाद्यांना घाबरण्याची गरज नाही, असा संदेश राज्यपाल म्हणून भगतसिंह कोश्यारी यांनी नक्षलग्रस्त भागात राहून जनतेला दिला होता.'

मुंबई भाजपचे सचिव सचिन शिंदे म्हणाले की, कोश्यारी यांनी हे सिद्ध केले आहे की, लोकशाहीत राज्यपालांना जनतेच्या भावना जपण्याचे पुरेसे अधिकार असतात. त्या भावना त्यांनी वेळोवेळी जपल्या. एक राज्यपाल म्हणून त्यांनी या राज्यावर आपली वेगळी छाप उमटवली असेही ते म्हणाले. यावेळी वारकरी संप्रदायाचे कृष्णा घाडगे, शंकर चिकणे, विठोबा घाडगे यांनीही शुभेच्छा दिल्या. विशाल तोडणकर, उत्तराखंड सेल भाजपचे अध्यक्ष महेंद्रसिंग गोसाई, महामंत्री राजेंद्र शर्मा, सुषमा गैरोला, यशोदा रावत आदी उपस्थित होते.