ग्लोबल साऊथमध्ये भारताची भूमिका निर्णायक

नवी दिल्ली : सध्या जग निर्णायक टप्प्यात आहे आणि बदलाचा कल भारताच्या बाजूने आहे. ग्लोबल साऊथमध्ये भारताचा उदय हा आंतरराष्ट्रीय घडामोडींमध्ये महत्त्वाचा मुद्दा असल्याचे मत हवाईदलप्रमुख एअरचीफ मार्शल व्ही. आर. चौधरी यांनी नुकतेच केले आहे.

सेंटर फॉर एअर पॉवर स्टडीजतर्फे २० व्या सुब्रतो मुखर्जी चर्चासत्राचे आयोजन करण्यात आले होते. “भारत आणि जागतिक दक्षिण: आव्हाने आणि संधी” या विषयावरील चर्चासत्राचे उद्घाटन एअर चीफ मार्शल व्ही.आर. चौधरी यांनी केले.

भारत वसाहतवादी छायेतून बाहेर पडून आणि समृद्ध ऐतिहासिक वारशासह एक प्रमुख जागतिक केंद्रबिंदू म्हणून उदयास आल्याने अनेक आव्हाने आणि संधी उभ्या राहिल्या आहेत. जसजसे भारत नवी भरारी घेत आहे, तसतसे राष्ट्रीय शक्तीचा एक महत्त्वाचा घटक म्हणून हवाई शक्ती निःसंशयपणे महत्त्वपूर्ण भूमिका बजावणार आहे. राष्ट्रीय शक्तीचे प्रतीक आणि शांतता आणि सहकार्याचे साधन म्हणूनही भारतीय हवाईदल काम करेल, असे एअर चीफ मार्शल चौधरी म्हणाले.

सामायिक सुरक्षा आव्हानांना सामोरे जाण्यासाठी आणि प्रादेशिक स्थिरता सुनिश्चित करण्यासाठी आमची हवाई उर्जा भागीदारी महत्त्वपूर्ण आहे. हवाई दल भारताच्या ग्लोबल साऊथमधील प्रमुख भूमिकेच्या प्रगतीसाठी एक उत्प्रेरक म्हणून काम करू शकते. त्यासाठी हवाईदलाने देशांसोबत प्रशिक्षण आणि सहकार्याची व्याप्ती वाढवली आहे. गेल्या नऊ वर्षांत, भारतीय वायुसेनेने ग्लोबल साउथमधील देशांमधून 5000 हून अधिक परदेशी प्रशिक्षणार्थींना प्रशिक्षण दिले. एलसीए, एलसीएस, आकाश क्षेपणास्त्र प्रणाली आणि रडार यांसारखे स्वदेशी एरोस्पेस प्लॅटफॉर्म दक्षिणेकडील हवाई दलांना स्पर्धात्मक आणि विश्वासार्ह पर्याय प्रदान करतात. त्यामुळे भारताप्रती त्यांचा विश्वास वाढत असल्याचेही एअर चीफ मार्शल व्ही. आर. चौधरी यांनी नमूद केले आहे.