पाणीवाटपासंदर्भात कर्नाटकशी कायम स्वरुपी करार करण्यास तयार - देवेंद्र फडणवीस

नागपूर : पाणीवाटपाचा तिढा सोडवण्यासाठी कर्नाटकशी कायम स्वरुपी करार करण्याची महाराष्ट्राची तयारी आहे. तेथील काँग्रेस सरकारशी चर्चा करण्यासाठी काँग्रेसचे ज्येष्ठ आमदार पृथ्वीराज चव्हाण आणि नाना पटोले यांनी सहकार्य करावे, असे आवाहन उपमुख्यमंत्री देवेंद्र फडणवीस यांनी गुरुवार, दि. १४ डिसेंबर रोजी केले.

 

शरद पवार गटाचे आमदार जयंत पाटील यांनी यासंदर्भात नियम-१०५ अन्वये लक्षवेधी विचारली होती. कोयना धरणातील पाणी वाटपाबाबत सांगली आणि सातारा जिल्ह्यांच्या पालकमंत्र्यांमध्ये समन्वय नाही. जलसंपदा मंत्र्यांनी तो समन्वय घडवावा. नदीपात्र कोरडे होवू नये, वाटल्यास कोकणच्या वीज निर्मितीसाठीचे पाणी कमी करा, अशी मागणी पाटील यांनी केली. पृथ्वीराज चव्हाण यांनीही लवादाची अडचण येणार नाही, असे मत व्यक्त केले. तर कर्नाटक राज्य पाणी द्यायला तयार आहे, पण आपल्याकडे जिल्ह्या-जिल्ह्यांत ताणतणाव नको, असे विश्वजीत कदम म्हणाले. सोलापूर जिल्ह्यावर अन्याय होऊ नये, असे समाधान औताडे म्हणाले.

 

उत्तरात उपमुख्यमंत्री देवेंद्र फडणवीस यांनी सांगितले, सध्या १४टीएमसी पाणी कमी आहे. पण आम्ही नदी कोरडी पडू देणार नाही. दोन जिल्ह्यांच्या कुस्तीत सोलापूर जिल्ह्याचे नुकसान होऊ देणार नाही. सीमा विषयक प्रश्न असले, तरी पाण्यासाठी महाराष्ट्र नेहमीच कर्नाटकला सहकार्य करते. परंतु, आपल्या हक्काच्या पाण्यासाठी त्या राज्याची भूमिका सहकार्याची नसते. पाणीवाटपासंबंधी कर्नाटकशी कायम स्वरुपी करार करण्याची महाराष्ट्राची तयारी आहे. तेथील काँग्रेस सरकारशी चर्चा करण्यासाठी काँग्रेसचे ज्येष्ठ सदस्य पृथ्वीराज चव्हाण आणि नाना पटोले यांनी सहकार्य, असे देवेंद्र फडणवीस म्हणाले.