हे विश्वची माझे घर...

साम्यवादी असलेल्या रशियामध्ये चेचेन्या आणि दागिस्तान हे कट्टरपंथी मुस्लिमांचे अड्डेच झाले आहेत. सुन्नी मुस्लीमबहुल असलेल्या दागिस्तानने तसे यापूर्वीही रशियन सरकारला नाकीनऊ आणले आहेच. हिंसाचार, अपहरण आणि सर्व प्रकारच्या गुन्ह्यांत दागिस्तान आघाडीवर. त्यामुळे रशियाचे पुतीन प्रशासनही काळजीत असते. आता तर दागिस्तानच्या जनतेने देशाच्या विमानतळावर हल्ला केला. देशाचे विमानतळ आहे किंवा देशाचे विमान आहे किंवा या विमानतळावर हल्ला करून परदेशी नागरिकांना त्रास दिला, तर जगात आपल्या देशाची प्रतिमा मलिन होईल, असे या हल्लेखोरांना वाटले नाही. देश, देशाची संपत्ती आणि प्रतिमा याहीपेक्षा त्यांना जिथे ते कधीही गेले नव्हते आणि जाणार नाहीत, अशा दूर असलेल्या पॅलेस्टाईनचे समर्थन करणे, हेच त्यांना कर्तव्य वाटले.

इस्रायल-‘हमास’ युद्धाचे पडसाद जगभर उमटले. सध्या अमेरिकेमध्येही ‘नॅशनल मुस्लीम डेमोक्रेटिक काऊंसिल’ने अमेरिकेचे राष्ट्रपती जो बायडन यांना इशारा दिला आहे की, बायडन यांनी पॅलेस्टाईनवर होणारा हल्ला थांबवण्यासाठी इस्रायलवर दबाव आणावा. पॅलेस्टाईनवरचे हल्ले इस्रायलने थांबवले नाहीत, तर याचे परिणाम निवडणुकीमध्ये बायडन यांना दिसतील. ‘नॅशनल मुस्लीम डेमोक्रेटिक काऊंसिल’च्या म्हणण्याचा अर्थ काय असेल? बायडन यांच्यावर काय परिणाम होणार? याबद्दलची माहिती अशी आहे की, २०२०च्या निवडणुकीमध्ये १.१ दशलक्ष मुसलमानांनी मतदान केले होते. यामध्ये ६४ टक्के मुसलमानांनी बायडन यांना मतदान केले होते, तर ३५ टक्के मुस्लिमांनी डोनाल्ड ट्रम्प यांना मत दिले होते. तेव्हा बायडन राष्ट्रपती झाले. याचाच अर्थ ‘नॅशनल मुस्लीम डेमोक्रेटिक काऊंसिल’ने इशाराच दिला आहे की, इस्रायलने हल्ले थांबवले नाहीत, तर अमेरिकेतील मुस्लीम एकत्र येतील आणि बायडन यांना मतदान करणार नाहीत. त्यामुळे बायडन हरतील, असे या संघटनेचे मत!

 

यावर जागतिक अभ्यासकांचे म्हणणे आहे की, जिथे आसरा मिळेल, तिथे प्रयत्नपूर्वक लोकसंख्या वाढवत आवश्यक ते निवासी पुरावे कसेही मिळवत, त्या परिसरातचे नागरिकत्व मिळवायचे. काही राष्ट्रीय कर्तव्य केले नाही तरी मतदानाचा हक्क कसोशीने पार पाडायचा, हे व्रत जगभरातले शरणार्थी आणि विस्थापित मुस्लीम एककलमी कार्यक्रम म्हणून राबवत असतात. त्याचाच परिणाम म्हणून अनेक पाश्चात्य देश हे हळूहळू मुस्लीमबहुल होत चालले आहेत. रशियाच्या सीमेवरीलही अनेक छोटछोटी गणराज्येही अशाच प्रकारे मुस्लीम झाली आहेत. आता अमेरिकेमध्ये मतदान हवे असेल, तर आमची मागणी मान्य करा, असे सांगणाराही संघटित मुस्लीम समुदाय तयार झाला आहे. भारतातही काही वेगळी परिस्थिती नाही. सगळ्या किनारपट्ट्या आणि रेल्वेरुळालगतचा भाग तसेच रेल्वे स्थानकाचा भाग, कोणत्याही वस्तीचे प्रवेशद्वार, गल्लीचा नाका इथे प्रयत्नपूर्वक जाणीवपूर्वक अशा वसाहती निर्माण होत आहेत.