मानाचि लेखक संघटनेचे सरकारला निवेदन
Total Views |
मुंबई : मालिका नाटक चित्रपट (मानाचि) लेखक संघटनेच्या राजेश देशपांडे, श्रीकांत बोजेवार, श्याम पेठकर, राहुल वैद्य व विवेक आपटे या प्रतिनिधींच्या मंडळाने सांस्कृतिक मंत्री सुधीर मुनगंटीवार यांची दि. २१ ऑक्टोबर २०२३ रोजी भेट घेऊन आपल्या विविध मागण्यांचे निवेदन सादर केले.
काय आहेत लेखकांच्या मागण्या ?
- लेखकाला आपल्या नाटकाचे किंवा चित्रपटाचे शीर्षक स्वतःच्या नावाने रजिस्टर करता यावे.
- कविता, गीते व संवादातील विशिष्ट शब्दरचना मालिकेचे शीर्षक म्हणून वापरली गेली तर मूळ लेखकाला त्याचे उचित श्रेय व एकवेळचे मानधन मिळावे.
- चित्रपटाच्या दिग्दर्शक, तंत्रज्ञ आणि मुख्य कलाकारांप्रमाणेच लेखकाचेही, ना हरकत प्रमाणपत्र (NOC) असल्याशिवाय या चित्रपटाला सेन्सॉर सर्टिफिकेट दिले जाऊ नये, या नियमाची काटेकोर अंमलबजावणी व्हावी.
- कॉपीराईट रजिस्ट्रेशन दिल्लीप्रमाणेच मुंबईतही व्हावे.
- वृद्ध व विकलांग लेखकांसाठी पेन्शन योजना असावी.
- मालिका नाटक चित्रपट लेखक संघटनेला त्यांच्या कार्यालयासाठी व त्यांचे विविध उपक्रम राबवण्यासाठी सरकारी आस्थापनात जागा मिळावी.
या मुद्द्यांवर सांस्कृतिक मंत्री सुधीर मुनगंटीवार यांच्याशी चर्चा झाली. यातील काही मुद्द्यांवर चित्रपट महामंडळ, चित्रनगरीचे संचालक व रंगभूमी प्रयोग परिनिरीक्षण मंडळाचे अध्यक्ष यांच्याशी बोलून या समस्या सोडवण्याबाबत योग्य तो मार्ग काढावा, असे त्यांनी सांगितले.