बेकायदेशीर मदरशांवर योगी सरकार सख्त; परदेशातून मिळणाऱ्या निधीची होणार चौकशी

 

लखनऊ : उत्तर प्रदेशात परदेशातून निधी घेणाऱ्या आणि बेकायदेशीर कारवाया करणाऱ्या आणि कट्टरवादाला प्रोत्साहन देणाऱ्या मदरशांवर योगी सरकार कडक कारवाई करत आहे. या मदरशांना मिळालेल्या निधीची चौकशी करण्यासाठी मुख्यमंत्री योगी आदित्यनाथ यांच्या सरकारने विशेष तपास पथक (एसआयटी) स्थापन केले आहे.

 

ज्या मदरशांना परदेशातून निधी मिळतो, त्यांचा वापर कसा होतो आणि किती बेकायदेशीर मदरसे अजूनही सुरू आहेत, याचा तपास ही एसआयटी करणार आहे. नुकतेच राज्यातील बेकायदेशीर मदरसे ओळखण्यासाठी सर्वेक्षण करण्यात आले होते. राज्यात १६,५१३ मान्यताप्राप्त आणि ८५०० बेकायदेशीर मदरसे सुरू असल्याचे या सर्वेक्षणातून समोर आले आहे. अवैध मदरशांवर परदेशातून निधी घेतल्याचा आरोप होता. या निधीची चौकशी आता एडीजी मोहित अग्रवाल यांच्या नेतृत्वाखालील एसआयटी करणार आहे.

 

उत्तर प्रदेशातील तराई जिल्ह्यांत बांधलेले मदरसे परदेशातून निधी घेण्यात आघाडीवर आहेत. हा मदरसा नेपाळच्या सीमेवर आहे. त्यांची संख्याही झपाट्याने वाढली आहे. या मदरशांच्या विरोधात यापूर्वीही तक्रारी प्राप्त झाल्या आहेत. एका अहवालानुसार, भारत-नेपाळ सीमेवर १५०० हून अधिक बेकायदेशीर मदरसे सापडले आहेत ज्यांना परदेशी निधी मिळत असल्याचा संशय आहे. हे मदरसे फंडिंग कसे घेत होते, ते कसे चालवले जात होते, याचाही तपास करण्याचा प्रयत्न करण्यात येणार आहे.