मुंबई भाजपचा त्रिशतकीय दांडिया महोत्सव; भव्यदिव्य आयोजनाची पुनरावृत्ती!

मुंबई : गणेशोत्सव आणि दहीहंडी पाठोपाठ मुंबईत नवरात्रोत्सवही दणक्यात साजरा करण्यासाठी भाजपने जय्यत तयारी सुरू केली आहे. गतवर्षीच्या प्रमाणे यंदाही काळाचौकीच्या शहिद भगतसिंग मैदानावर मराठी दांडियाचे आयोजन करण्यात आले असून भव्यदिव्य आयोजनाची पुनरावृत्ती भाजपकडून करण्यात आली आहे. यासह भाजपकडून एकूण तीनशे ठिकाणी कार्यक्रम आयोजित करण्यात आले असून त्रिशतकीय दांडिया महोत्सवातून गुजरातीसह मराठी मतांना खेचण्याची रणनिती आखण्यात आली आहे.

मुंबई भाजपचे अध्यक्ष आणि आमदार आशिष शेलार यांनी मंगळवारी पत्रकार परिषद घेत याबाबत माहिती दिली आहे. दादर येथील वसंतस्मृती या भाजप कार्यालयात आयोजित पत्रकार परिषदेस सुप्रसिद्ध गायक अवधूत गुप्ते, आमदार मिहीर कोटेचा, माजी नगरसेवक प्रभाकर शिंदे, माध्यम सहप्रमुख ओमप्रकाश चव्हाण उपस्थित होते.संपूर्ण मुंबई शहरात भाजपतर्फे एकूण 300 ठिकाणी वेगवेगळ्या कार्यक्रमांचे आयोजन करण्यात आलेलं आहे. त्यापैकी 200 ठिकाणचे कार्यक्रम थेट भाजपने तर उर्वरित 100 कार्यक्रम भाजप पुरस्कृत आयोजित करण्यात आले आहेत.