आर्टिस्टिक इंटिरिअर डिझायनर सुरुची श्रीवास्तव

भारतात तसे ‘इंटिरिअर डिझायनिंग’ या गोष्टींबद्दल गेल्या काही वर्षांतच लोकांचा ओढा वाढायला लागला आहे. याआधी या सर्व गोष्टींकडे लक्ष दिले जात नव्हते. याआधी बर्‍याच जणांचे या क्षेत्राच्या गरजेबद्दल या क्षेत्राच्या महत्त्वाबद्दल ज्ञान फारच तोकडे होते. या तोकड्या ज्ञानामुळे या क्षेत्राकडे बघण्याचा दृष्टिकोनही वेगळा आणि पूर्वग्रहदूषित होता. व्यवसायाच्या सुरुवातीच्या काळात सुरुची यांनाही या भावनांचा सामना करावा लागला होता. पण, जेव्हा सुरुची यांनी परदेशांत भ्रमंती केली, अमेरिका, इंग्लंड या देशांमध्ये भ्रमंती केली तेव्हा तिथली संस्कृती बघून, तिथले त्यांचे इंटिरिअर, कलाक्षेत्र या सर्व गोष्टींबद्दलची जागरूकता, त्यांची या गोष्टींबद्दलची आस्था हे सगळे पाहून सुरुची खूप प्रभावित झाल्या होत्या. तशी संस्कृती भारतात का नाही, असा विचार करून त्यांनी भारतात जेव्हा व्यवसायाला सुरुवात केली. तेव्हा, सुरुवातीला जरी लोकांचा याकडे बघण्याचा दृष्टिकोन पूर्वग्रहदूषित असला तरी आता गेल्या काही वर्षांत तो बदलतोय. सध्या भारतात या क्षेत्राची वाढ जोमाने सुरू आहे. आज प्रत्येक जण आपले घर सुंदर दिसावे यासाठी प्रयत्नशील असतो. याचमुळे भारतात या क्षेत्राला चांगले दिवस आले आहेत आणि या क्षेत्राची भविष्यातील वाढ खूप मोठी असेल, असेही सुरुची यांनी सांगितले.