१.५८ लाख कोटींची गुंतवणूक १ लाख नोकऱ्या असं आहे वेदांता-Foxconnचं संपूर्ण मॉडेल!

 

 

 

मुंबई: वेदांत लिमिटेडने त्यांच्या अर्धसंवाहक प्रकल्पासाठी पंतप्रधान नरेंद्र मोदी यांचे गृहराज्य गुजरातची निवड केली आहे. या प्रकल्पासाठी वेदांताने तैवान-आधारित इलेक्ट्रॉनिक्स निर्माता फॉक्सकॉनसोबत $20 अब्ज (रु. 1.58 लाख कोटी) करार केला आहे. वेदांत समूहाचे अध्यक्ष अनिल अग्रवाल यांनी ट्विट करून ही माहिती दिली आहे.

 

“वेदांत-फॉक्सकॉनने भारतातील एक मजबूत उत्पादन बेस तयार करण्यासाठी त्यांच्या सेमीकंडक्टर प्रकल्पासाठी गुजरातची निवड केली आहे. सुमारे १.५४ लाख कोटी रुपये खर्चून सेमीकंडक्टर प्लांट उभारण्यासाठी राज्य सरकारसोबत सामंजस्य करार करण्यात आला. यासाठी संपूर्ण राज्य सहकार्य करेल." असे सीएम पटेल म्हणाले. या प्रकल्पामुळे पंतप्रधान नरेंद्र मोदी यांचे स्वप्न पूर्ण होण्यास मदत होणार असल्याचे ते म्हणाले. १ लाख थेट कुशल रोजगार उपलब्ध होण्यासोबतच भारताची इलेक्ट्रॉनिक आयात कमी होण्याची अपेक्षा आहे. त्यामुळे देशातील उत्पादन क्षेत्राला मदत होणार आहे.

 

अनिल अग्रवाल म्हणाले, “वेदांतला इतक्या लवकर कनेक्ट करण्यात मदत केल्याबद्दल मी गुजरात सरकार आणि केंद्रीय आयटी मंत्री यांचे मनापासून आभार मानतो. भारताची तंत्रज्ञान इकोसिस्टम वाढेल, ज्याचा फायदा प्रत्येक राज्याला नवीन इलेक्ट्रॉनिक्स उत्पादन केंद्रांद्वारे होईल."

 

भारताची स्वतःची सिलिकॉन व्हॅली आता एक पाऊल जवळ आली आहे, असे वेदांताच्या अध्यक्षांनी ट्विट केले आहे. ते म्हणाले, “भारत केवळ आपल्या लोकांच्याच डिजिटल गरजा पूर्ण करणार नाही, तर समुद्रापार असलेल्या लोकांच्याही गरजा पूर्ण करेल. चिप टेकर ते चिप मेकर असा प्रवास अधिकृतपणे सुरू झाला आहे."