फुलविक्रेत्या मायलेकींनी जिंकले अनुपम खेर यांचे मन

 

 

 

 

मुंबई : कोणत्याही चाहत्याला आपला आवडता कलाकार दिसला की त्यांचा आनंद अवर्णनीय असतो. तसेच मराठी असो वा बॉलिवूड कलाकारांनाही आपले चाहते बघून तसाच आनंद वाटतो. सध्या असाच एक अनुभव अभिनेते अनुपम खेर यांना आला आहे. मुंबईच्या ट्रॅफिकमध्ये त्यांना एक मायलेकीची जोडी भेटल्याचे दिसत आहे.

 

 

 

मुंबईच्या भर पावसात सिग्नलवर फुलं विकणारी ही मायलेकींची जोडी अनुपम यांना भेटली असून सध्या त्यांच्यासोबत काढलेला एक व्हिडिओ खूप व्हायरल होत आहे. यामध्ये ती महिला अनुपम खेर यांना फूल देऊन फ्रेंडशिप डेच्या शुभेच्छा देताना दिसत आहे. या महिलेचं नाव सुनीता असं असून सोनल ही तिची चिमुकली लेक सुद्धा तिच्यासह फुलं विकताना दिसत आहे. यामध्ये सोनल आणि अनुपम यांच्यात इंग्रजीतून एक संवाद होताना दिसत आहे. आणि अनुपम यांच्या प्रश्नांना सोनल अगदी निरागसपणे उत्तर देत आहे. पावसात अनुपम यांना भेटलेली ही फॅन्सची जोडी त्यांना फारच आवडल्याचं दिसत आहे. आपल्या इन्स्टाग्रामवर विडिओ शेअर करत त्यांनी या दोघींचं खूप कौतुक केलं आहे.

 

 

 

अनुपम खेर यांनी या व्हिडिओच्या कॅप्शनमध्ये लिहिले आहे की, “मुंबईच्या ट्रॅफिक सिग्नलवर फुलं विकणारी ही आई-मुलीची जोडी फारच छान आहे. त्यांनी माझं मन अगदी जिंकून घेतलं आहे. सुनीता आणि सोनल यांचं हसू माझं दिवसभराचं टेन्शन गायब करायला पुरेसं आहे. देव त्यांना निरोगी आणि दीर्घायुष्य देवो. त्यांची सगळी स्वप्नं पूर्ण होवो अशी इच्छा. थँक्यू! जय हो!”

 

 

 

अनुपम यांनी शेअर केलेले अनेक व्हिडिओ सध्या व्हायरल होत आहेत. त्यांनी नुकताच एका व्यक्तीचा व्हिडिओ शेअर केला होता ज्यामध्ये जितू नावाची व्यक्ती हातात तिरंगा घेऊन धावताना दिसत आहे. सध्या पंतप्रधान नरेंद्र मोदी यांनी भारताच्या अमृत महोत्सवी स्वातंत्र्यदिनाच्या निमित्ताने ‘आझादी का अमृत महोत्सव’ आणि ‘हर घर तिरंगा’ नावाची मोहीम आयोजित केली आहे.

 

 

 

 

ज्याच्या अंतर्गत अनेकजण आपले डीपी आणि फोटोसुद्धा बदलून तिरंग्याचे फोटो ठेवताना दिसत आहेत. त्यातच एक व्यक्ती हातात भारताचा झेंडा घेऊन धावताना दिसत असल्याचा हा व्हिडिओ अनेक भारतीयांचं मन जिंकत आहे.