'मी प्रत्येक कथेत त्यालाच शोधत होतो...'
Total Views |
मुंबई : 'गोदावरी' हा मराठी चित्रपट गेले अनेक दिवस खूप चर्चेत आहे. अभिनेता जितेंद्र जोशी यांनी सोशल मिडीयावर या चित्रपटाच्या प्रदर्शनाची तारीख घोषित केली आहे. आपल्या चित्रपटाची तारीख घोषित करताना जितेंद्र जोशी यांनी गोदावरी काठी शूट करण्यात आलेल्या व्हिडिओमध्ये त्याचे दिवंगत मित्र, प्रख्यात दिग्दर्शक निशिकांत कामत यांना त्यांच्या दुसऱ्या स्मृतिदिनानिमित्त विशेष श्रद्धांजली वाहिली आहे.
या व्हिडिओमध्ये जितेंद्र जोशी आपल्या भावना व्यक्त करत म्हणाले आहेत, “जेव्हा निशी आम्हाला सोडून गेला तेव्हा खूप एकटं पडल्यासारखं वाटत होतं. मी प्रत्येक कथेत त्यालाच शोधत होतो. त्याच्या नसण्यावर प्रश्नचिन्ह उभे करत होतो, त्याचं असणं माझ्या अवतीभोवती हवं होतं. आणि तेच शोधत असताना मी गोदावरीशी बोलू लागलो आणि तिथेच मला निशिकांत सापडला. आजही मला त्याची खूप आठवण येतेय.”
'गोदावरी' चित्रपटाला आत्तापर्यंत अनेक भारतीय तसेच जागतिक पुरस्करांनी गौरवण्यात आले आहे. त्याचबरोबर २०२१सालातील, भारतातील सर्वोत्तम १० चित्रपटांमध्ये 'गोदावरी'ची निवड करण्यात आली. न्यूयॉर्क इंडियन फिल्म फेस्टिव्हल २०२२ मध्ये ओपनिंग फिल्म म्हणून या चित्रपटाची निवड करण्यात आली होती. महत्वाचं म्हणजे IFFI २०२१ मध्ये जितेंद्र जोशीने सर्वोत्कृष्ट अभिनेत्याचा सिल्व्हर पीकॉक पुरस्कार जिंकला, तर निखिल महाजन यांना सर्वोत्कृष्ट दिग्दर्शकासाठीचा विशेष ज्युरी पुरस्कार मिळाला.
आंतरराष्ट्रीय चित्रपट महोत्सव २०२२ मध्ये, निखिल महाजन यांना सर्वोत्कृष्ट दिग्दर्शकाचा पुरस्कार आणि शमीन कुलकर्णी यांना सर्वोत्कृष्ट सिनेमॅटोग्राफीचा पुरस्कार प्रदान करण्यात आला. तर एवी प्रफुल्ल चंद्रा यांना विशेष ज्युरीचा सर्वोत्कृष्ट संगीत पुरस्कार मिळाला. याचबरोबर गोदावरीचा जागतिक प्रीमियर व्हँकुव्हर इंटरनॅशनल फिल्म फेस्टिव्हल २०२१ आणि एशिया पॅसिफिक प्रीमियर न्यूझीलंड इंटरनॅशनल फिल्म फेस्टिव्हल २०२१ मध्ये झाला होता.
जिओ स्टुडिओ प्रस्तुत, ब्ल्यू ड्रॉप फिल्म्स आणि जितेंद्र जोशी पिक्चर्स निर्मित 'गोदावरी' हा चित्रपट येत्या ११ नोव्हेंबर रोजी सिनेमागृहात प्रदर्शित होणार आहे. या चित्रपटात जितेंद्र जोशी यांनी प्रमुख भूमिका साकारली आहे तर विक्रम गोखले, नीना कुलकर्णी, संजय मोने, प्रियदर्शन जाधव असे प्रतिभाशाली कलाकारही या चित्रपटामध्ये आहेत.