श्रावणाच्या पहिल्याच दिवशी बोंबिल जॅकपॉट; खवय्ये कमालीचे खुष
Total Views |
मुरूड जंजिरा: श्रावण महिना शुक्रवार पासून सुरू झाला आणि पहिल्याच दिवशी मुरूड च्या मार्केट मध्ये राजपुरी येथून टोपलीच्या टोपलीने गटगटे बोंबील सकाळ पासून विक्रीस येताना दिसत होते. खुप दिवसांनी ताजा बोंबीलांचा काहीसा स्वस्त मोठा जॅकपॉट जणू लागल्याने मांसाहारी खवय्ये मात्र खूष दिसून येत होते. बोंबील खरेदीसाठी मार्केट मध्ये सकाळी ११वाजता मोठी गर्दी उसळली होती.
८० ते १०० रुपये वाटा या प्रमाणे बोंबील विक्री होताना दिसत होती.जोडीला छोटी कोलंबी आंबाड, लाल कोलंबी, बोईट मासळी, मांदेली आदी मासळी देखील उपलब्ध झालेली दिसत होती.मुरूड मध्ये किलो प्रमाणे मासळी विक्री होत नाही.वाट्या प्रमाणे विक्री होत असते.चिकन,मटण दुकानांतून मात्र शुकशुकाट दिसत होता. पावसाने उसंत घेतल्याने बाजारपेठेत वर्दळ दिसून येत होती.
उथळ समुद्रातील मच्चीमारीतून बोंबील मिळत असल्याचे सांगण्यात आले. १ ऑगस्ट पासून खोल समुद्रातील मासेमारी सुरू होणार असून त्यासाठी नौका सज्ज होताना दिसून येत आहेत. अजूनही समुद्र खवळलेला असून वादळाची चिन्हे दिसून येत आहेत.पावसाने घेतलेली उसंत ही आगामी काळात धोकादायक ठरू शकते, अशी माहिती बुजुर्ग मंडळींनी दिली.हवामान खात्याच्या अंदाजा नुसार ऑगस्ट, सप्टेंबर महिन्यात अति मुसळधार पाऊस पडण्याची शक्यता आहे.
मानवी शरीरासाठी बोंबील ही मासळी उपयुक्त असल्याचे वैद्यकीय क्षेत्रातील मान्यवरांचे म्हणणे आहे.त्यामुळे बोंबील खाण्याकडे वाढता कल दिसत आहे.ऑगस्ट महिन्यात पापलेट सारखी मोठी मासळी मार्केट मध्ये येईल अशी माहिती मच्चीमारांनी दिली.श्रावण महिन्यात अनेक मंडळीं मांसाहार करीत नसल्याने मासळीच्या किमती देखील कमी होतात.
