'सलीम' फ्लेमिंगोची कमाल; १६ तासात मुंबईहून गाठले भावनगर

'सलीम' हा लेसर फ्लेमिंगो (लेग बँड कोड एएसआर) दि. ७ जुलै रोजी गुजरातला पोहोचला. वाशीजवळील पाणथळ प्रदेशातून ६ जुलै रोजी सायंकाळी पाच वाजता या पक्ष्याने प्रवास सुरू केला आणि दि. ७ रोजी सकाळी ७ वाजता घोघा बीचवर पोहोचला. या पक्ष्याने तब्बल ३०० किमीचे अंतर १६ तासात काटले. सध्या हा फ्लेमिंगो भावनगर विमानतळाजवळील पाणथळ प्रदेशात वास्तव्यास आहे.

बीएनएचएसने 'मुंबई ट्रान्स हार्बर लिंक' पर्यावरण प्रभाव मूल्यांकन प्रकल्पाचा भाग म्हणून ठाणे खाडीतील 'लेसर' आणि 'ग्रेटर' फ्लेमिंगोचे स्थलांतर आणि अधिवास समजून घेण्यासाठी 'उपग्रह टेलिमेट्री अभ्यास' सुरू केला. याद्वारे शास्त्रज्ञांनी या वर्षी जानेवारी ते एप्रिल या कालावधीत भरतीच्या ठिकाणी सहा फ्लेमिंगो पकडले. त्यानंतर फ्लेमिंगोंवर सौर उर्जेवर चालणारे 'जीपीएस-जीएसएम' रेडिओ टॅग लावण्यात आले होते. या सहा फ्लेमिंगोना 'खेंगरजी' , 'लेस्टर' 'मॅककॅन' 'सलीम' 'हुमायून' 'नवी मुंबई' अशी नवे देण्यात आली होती. सध्या, 'सलीम' पक्षी भावनगर विमानतळाजवळील पाणथळ प्रदेशात वास्तव्यास आहे. बीएनएचएसचे ज्येष्ठ पक्षीशास्त्रज्ञ डॉ. सलीम अली यांच्या स्मृतीप्रीत्यर्थ हे नाव देण्यात आले होत. फ्लेमिंगोंचे खाद्य, प्रजनन आणि स्टॉपओव्हर साइट्सचे संरक्षण करण्यासाठी ही माहिती महत्त्वपूर्ण आहे. या अभ्यासानंतर त्यांच्या संवर्धनासाठी व्यवस्थापन कृती सुचवण्यात येणार आहेत.