महापालिकेच्या अनास्थेमुळे मैदानाचा झाला उकिरडा

 

 

 

 

 

ठाणे : ठाणे महापालिका क्षेत्रातील माजीवडा येथील खेळाच्या मैदानासाठी आरक्षित असलेल्या आरक्षण क्रमांक ७ सेक्टर ४ या भूखंडाचा अक्षरश: उकिरडा झाला आहे. महापालिकेच्या दुर्लक्षामुळे हे मैदान खेळाडूंसाठी गैरसोयीचे ठरले आहे. गेल्या अनेक वर्षांपासून महापालिकेकडून या मोकळ्या मैदानाची अवस्था सुधारण्यासाठी कोणत्याही प्रकारचे नियोजन केले नसल्याचे समोर आले असुन दाट वाढलेली झाडी आणि राड्यारोड्यामुळे या परिसरात राहणाऱ्या झोपडीवासियाना प्रात:विधीसाठी मोकळे रान मिळाले असल्याचा आरोप ठाणे सिटिझन्स फाऊंडेशनने केला आहे.

 

 

 

ठाण्यातील मोकळ्या जागांची संख्या झपाट्याने कमी होत असुन महापालिकेकडून आरक्षित करण्यात आलेल्या मैदानांची देखभाल व नियोजनही ढेपाळले आहे. माजीवडा येथील खेळाच्या मैदानासाठी आरक्षित असलेल्या आरक्षण क्रमांक ७ सेक्टर ४ या जागेवर ठाणे महापालिकेच्या मालकीचे मैदान आहे. परंतु या मैदनाची अवस्था दयनिय झाली आहे. वर्तकनगर आणि पोखरण भागातील अनेक स्थानिक क्रिकेटप्रेमी या मैदानामध्ये क्रिकेट खेळण्यासाठी येतात. परंतु त्यांना येथील गैरसोईंचा सामना करावा लागतो. मैदानावर वाढलेले गवत, दगडांचा खच, मद्यपींकडून फेकण्यात आलेल्या मद्याच्या बाटल्यांच्या काचेचे तुकडे आणि आसपासच्या झोपडपट्ट्यांमधील रहिवाशांनी केलेली हागणदारी यामुळे या भागात खेळणे अचडणीचे ठरत आहे.नियोजन नसल्यामुळे हे आरक्षित मैदान खुले शौचालय बनले आहे.यामुळे ही संपुर्ण जागाच अस्वच्छ झाली आहे.तेव्हा, हे आरक्षित मैदान तातडीने सुधारावे. अशी मागणी सोसायटीतील रहिवाश्याकडुन केली जात आहे.ठाणे महापालिकेचे खेळाच्या मैदानाचे आरक्षण असलेले विस्तीर्ण जागा महापालिकेच्या दुर्लक्षामुळे गैरप्रकाराचे केंद्रबिंदू ठरू लागली आहे.

 

 

 

 

ठाण्यात आधीच खेळण्यासाठी मैदानांची वानवा आहे. आता वर्तकनगर आणि पोखरण रोड परिसरातून खेळण्यासाठी येणाऱ्या क्रिडापटूंनी पालिका आयुक्त यांच्याकडे जानका मंदिर, अवर लेडी ऑफ द या चर्च आणि लिटिल फ्लॉवर हायस्कूलजवळील ठाणे महापालिकेचे मैदान विकसित करण्याची विनंती केली आहे. हे मैदान विकसीत झाल्यास स्थानिक खेळाडूंना खेळासाठी एक विस्तीर्ण जागा उपलब्ध होऊ शकेल, अशी मागणी ठाणे सिटिझन फाऊंडेशनने केली आहे.