महाराष्ट्र राज्य पाठ्यपुस्तक भांडारात रोज मद्यपार्टी

नाशिक: नाशिकमधील महाराष्ट्र राज्य पाठ्यपुस्तक भांडाराच्या कार्यालयात अधिकारी मद्य पिताना आढळून आल्याने खळबळ उडाली आहे. येथील स्थानिक नागरिकाने ‘स्टिंग ऑपरेशन’ करून या प्रकरणाचा भांडाफोड केला. भांडार व्यवस्थापक या कार्यालयात गेल्या काही दिवसांपासून रोज मद्य पीत असल्याची माहिती मिळाली होती. त्यानंतर त्यांचे कृत्य चव्हाट्यावर आणण्यासाठी व्हिडिओ तयार केला. आता या प्रकरणी पुढे काय कारवाई होणार, हे पाहावे लागणार आहे. दरम्यान, जर महाराष्ट्र राज्य पाठ्यपुस्तक भांडाराच्या विद्येच्या पवित्र कार्यालयात त्या विभागाचे प्रमुखच असे काम करत असतील, तर कर्मचार्‍यांचे काय, असा सवाल विचारला जात आहे. विशेष म्हणजे गेल्या अनेक दिवसांपासून हा प्रकार सुरू होता. त्याकडे कोणाचेही कसे काय लक्ष गेले नाही, याबद्दलही आश्चर्य व्यक्त केले जात आहे.

 

 

नाशिकमधील लेखानगर या भागात महाराष्ट्र राज्य पाठ्यपुस्तक भांडाराचे कार्यालय आहे. येथे शालेय विद्यार्थ्यांसाठी आवश्यक असणारे पुस्तकांची निर्मिती होते. कार्यालयातील अनेक खोल्यांमध्ये पुस्तकाचे गठ्ठे आहेत. मात्र, या पुस्तकांच्या गठ्ठ्यांना लागणारे हात आधी मद्याच्या ग्लासला लागल्याचे समोर येत आहे. या कार्यालयाचे व्यवस्थापक लक्ष्मण यशवंत डामसे हे रोज एका खोलीत मद्य पित बसत असायचे. हा सारा प्रकार आता समोर आला आहे. शिवाय एका पलंगावर डामसे हे स्वतः मद्य पित असल्याचे समोर आले आहे.

 

 

महाराष्ट्र राज्य पाठ्यपुस्तक भांडाराचे व्यवस्थापक असे मद्याच्या नशेत आढळल्यानंतर डामसे यांच्यावर तिथेच प्रश्नांच्या फैरी सामाजिक कार्यकर्त्यांच्यावतीने झाडण्यात आल्या. मात्र, त्या प्रश्नांना उत्तर देण्याची शुद्धही त्यांच्यात नव्हती. यावेळी अनेक कर्मचार्‍यांनीही सामाजिक कार्यकर्त्यांसमोर आपली कैफियत मांडली. सामाजिक कार्यकर्त्यांनी या सार्‍या घटनेचा व्हिडिओ तयार केला आहे. या प्रकरणी डामसे यांच्यावर तातडीने कारवाई करण्यात यावी, अशी मागणी करण्यात आली आहे. यावरून पाठ्यपुस्तक मंडळाचा भोंगळ आणि बेधुंद कारभार होतो कसा, याचे एक चित्रही महाराष्ट्रासमोर आले असल्याची भावना नागरिकांनी व्यक्त केली आहे.