"जो झुकेगा उसीका करियर चलेगा" - विवेक अग्निहोत्री

 

 

 

राष्ट्रीय पुरस्कार विजेते चित्रपट दिग्दर्शक विवेक रंजन अग्निहोत्री यांच्या 'द काश्मीर फाइल्स' चित्रपटाचा ट्रेलर २१ फेब्रुवारी २०२२ रोजी प्रदर्शित झाला. चित्रपट समीक्षक अनुपमा चोप्रा यांना 'शूर्पणखा' म्हणत चित्रपटाचे नुकसान करण्याचा प्रयत्न केल्याचा आरोप त्यांनी नुकताच केला होता. आता त्याने एका व्हिडीओमार्फत चोप्राच्या कामाबद्दल सविस्तर माहिती दिली आहे. यासोबतच कथितपणे बॉलिवूड चालवणाऱ्यांची बोललीवूडचे नियम ठरवणाऱ्यांची नावेही त्यांनी व्हिडिओमध्ये दिली आहेत.

 

विवेक अग्निहोत्रीने गुरुवारी प्रसिद्ध केलेल्या व्हिडिओमध्ये सांगितले आहे की तो त्याच्या चित्रपटाच्या प्रेक्षकांशी थेट संपर्कात आहे. ज्या प्रेक्षकांना चांगल्या आशयाचे चित्रपट बघायचे आहेत, त्यांनी त्यांच्याशी थेट संपर्क साधला आहे. तसेच आजच्या काळात केवळ ट्विटर किंवा इन्स्टाग्रामवर चित्रपटाची जाहिरात करून जनजागृती होऊ शकत नाही. प्रत्येकाला चित्रपटाची माहिती व्हावी आणि चित्रपटगृहांमध्ये पोहोचता यावे यासाठी करोडो आणि करोडोंमध्ये खेळणाऱ्या बॉलीवूडच्या दिग्गजांशी लढा द्यावा लागतो. कारण दुर्दैवाने त्यांनी सगळी मीडियाच विकत घेतली आहे.

 

यावेळी त्यांनी करण जोहर (धर्मा प्रॉडक्शन), यशराज प्रॉडक्शन, विधू विनोद चोप्रा यांची नावे घेत सांगितले की, बॉलीवूडमध्ये असे ४-५ मोठे प्रोडक्शन हाऊस आहेत जे बॉलीवूडचे नियम ठरवतात. इथे कोणाचे करियर चालेल आणि कोणाचे नाही हे ते ठरवतात. ज्यांना आपले करियर चालवायचे आहे, त्यांना त्यांच्या समोर नतमस्तक व्हावे लागते. आणि जे त्यांच्या समोर नतमस्तक होत नाही त्यांना ते संपवण्याचा प्रयत्न करतात.

 

 

 

 

"परंतु विवेक रंजन अग्निहोत्री त्यांच्यापुढे कधीही झुकला नाही आणि कधी झुकणारही नाही. आणि याचा परिणाम असा आहे की मला त्याची नुकसान भरपाई द्यावी लागेल," असेही विवेक अग्निहोत्रीने स्पष्ट केले. पुढे तो म्हणाला की ट्विटरने त्याला अनुपमा चोप्राच्या फिल्म कम्पॅनियनचे ट्विट वाचण्याची शिफारस केली आहे, ज्यामध्ये "गहराइयाँ" या चित्रपटाची प्रशंसा केली आहे. हे लोक ज्या चित्रपटाला प्रेक्षकांनी कचऱ्याच्या डब्यात फेकलं आहे अश्या चित्रपटाला जबरदस्ती प्रसिद्धी देण्याचा प्रयत्न करतायत.

 

अग्निहोत्री म्हणाले, “मला वाटले की फिल्म कंपेनियन प्रत्येक चित्रपटाबद्दल लिहितो, म्हणून आमच्या ट्रेलरला, ज्याला १२ ते २४ तासांत ७.८ दशलक्ष व्ह्यूज मिळाले, त्याबद्दल काहीतरी लिहिले असेल. लोक ट्रेलरबद्दल स्तुती करत आहेत की आम्ही काश्मीरबद्दल यापेक्षा जास्त सत्य पाहिलेले नाही, म्हणून मला वाटले की काश्मिरी पंडित (विधू विनोद चोप्रा) सोबत लग्न केले आहे, ज्याने काश्मीरवर दोन मोठे चित्रपट बनवले होते. कश्मीर फाइल्सच्या ट्रेलरबद्दल त्यांच्या साइटवर काहीतरी लिहिलेले असेल. म्हणून मी जाऊन तपासले."

 

यानंतर अग्निहोत्रीने व्हिडिओमध्ये सांगितले आहे की फिल्म कंपेनियनने "गहराइयाँ"बद्दल ट्विटची मालिकाच सुरु केली आहे. पण काश्मीर फाइल्सबद्दल फक्त एक ट्विट होते. त्यात त्याच्या मागील 'द ताश्कंद फाइल्स' या चित्रपटाचा संदर्भ देत त्याला 'थर्ड-रेट पॉलिटिक्समधील सेकंड-हँड हिस्ट्री लेसन' असे म्हटले आहे. “हे काम एकतर वेडा माणूस करू शकतो किंवा पैशाने पूर्णपणे विकलेला माणूस किंवा अत्यंत दुष्ट बुद्धीचा माणूस करू शकतो. मी त्याला शहरी नक्षल म्हणतो, जो दुष्ट बुद्धीचा माणूस आहे," अशी टीकाही विवेक अग्निहोत्रींनी केली आहे.

 

तसेच पुढे, विधू विनोद चोप्रा यांच्या 'शिकारा' चित्रपटाबद्दल आणि त्यांच्या 'ताश्कंद फाइल्स'बद्दल बोलताना ते म्हणाले की IMDB मध्ये शिकाराचे रेटिंग हे ३.९ आहे, तर 'ताश्कंद फाइल्स'चे रेटिंग हे ७.९ आहे. अनुपमावर निशाणा साधत ते म्हणाले, "तिच्या पतीच्या चित्रपटात Conflict of interest असूनही तिने त्या चित्रपटाला खूप प्रसिद्धी देण्याचा प्रयत्न केला." परंतु चोप्राचा चित्रपट पाहिल्यानंतर काश्मिरी पंडितांची नक्की काय प्रतिक्रिया होती हे देखील त्यांनी व्हिडिओमध्ये दाखवले.

 

व्हिडिओमध्ये पुढे बोलताना ते म्हणाले कि, “आता मला सांगा हिच्या नवऱ्याने काश्मिरी नरसंहारावर दोन चित्रपट बनवले. पहिल्या चित्रपटात त्याने दहशतवाद्याला न्याय देण्याचा प्रयत्न केला पण काश्मिरी पंडितांच्या वेदनांवर एक शब्दही बोलला नाही आणि दुसऱ्या चित्रपटात त्याने उत्तर दिले, काय फरक पडतो, ज्यांनी तुझ्या आईवर बलात्कार केला, तुझ्या भावांचे, बापाचे ५० तुकडे करून फेकून दिले. , त्या लोकांना मिठी मारा आणि माफ करून पुढे जा. तुम्हाला हा करण जोहरचा चित्रपट वाटला का? "गहराइयाँ"सारख्या चित्रपटाचे तुम्ही प्रमोशन करता आणि जेव्हा काश्मिर फाइल्सचा प्रश्न येतो, ज्यासोबत १० लाख काश्मिरी लोकांच्या भावना जोडलेल्या आहेत , ज्याबद्दल भारतातील प्रत्येक तरुण, प्रत्येक व्यक्ती त्रस्त आहे. असा चित्रपट प्रदर्शित होण्यापूर्वीच तुम्ही त्या चित्रपटासोबत असं कसं करू शकता?

 

एवढंच नाही तर विवेक अग्निहोत्रींनी असेही सांगितले आहे की,"तुम्हाला चित्रपटांबद्दल थोडेजरी प्रेम असेल, तर मी तुम्हाला आव्हान देतो की तुमच्या बॉलीवूडने बहिष्कार टाकलेला स्वतंत्र चित्रपट निर्माता म्हणून माझ्यासोबत कुठेही उभं राहून सिनेमाबद्दल बोला."