चित्रपट चालावा म्हणून खानांची ‘मन्नत’

बॉलीवूडच्या खान मंडळींचा एखादा चित्रपट प्रदर्शित होत असेल, तर मंदिरात जाणे हा तसा नित्यनियमच. सध्या यात आघाडीवर आहे तो शाहरूख खान. तब्बल चार वर्षांनंतर त्याचा ’पठाण’ हा चित्रपट पुढील वर्षी २५ जानेवारीला चित्रपटगृहात प्रदर्शित होणार आहे. चित्रपट प्रदर्शित होण्यापूर्वी त्याने मक्का येथे ‘उमराह’ केल्यानंतर नुकतेच माता वैष्णोदेवीचेही दर्शन घेतले. मंदिरात पोहोचल्याचे अनेक व्हिडिओ सध्या सोशल मीडियावर ‘व्हायरल’ झाले आहेत. कटरा येथील वैष्णोदेवी मंदिराजवळच्या या व्हिडिओत शाहरुख घाईगडबडीने मंदिराकडे जाताना दिसत आहे. विशेष म्हणजे, शाहरूखने यावेळी आपला अर्धा अधिक चेहरा मास्कने झाकलेला होता. मंदिरात गेल्यानंतर कट्टरतावादी शांत बसतील तरी कसे? त्यांनीही त्याच्यावर मुस्लीम धर्माची चेष्टा केल्याचे सांगत संताप व्यक्त केला. ऑगस्ट २०२२ मध्येही शाहरुख खानने गणेश चतुर्थीच्या मुहूर्तावर सोशल मीडियावर गणेश मूर्तीचे छायाचित्र ठेवल्यानंतर कट्टरतावादी भडकले होते. शाहरूखने कितीही मंदिराचे उंबरे झिजवले तरी त्याच्या पोटातले अनेकदा ओठावर आले आहे. नुकताच मुलगा आर्यन खानमुळे तर त्याच्या कारकिर्दीवर मोठा डाग लागला. ड्रग्ज प्रकरणात मुलगा अडकल्याने मोठा वादंग उठला. नंतर तो या कचाट्यातून सुटला पण तरीही अनेक प्रश्न अनुत्तरीत राहिले. दरम्यान, काही दिवसांपूर्वीच आमिर खान त्याची घटस्फोटित पत्नी किरण राव सोबत सत्यनारायणाच्या पूजेला बसला होता. त्यामुळे एकेकाळी ‘भारतात राहण्याची इच्छा नाही,’ असे बोलणार्‍या दोघांनी चक्क सत्यनारायणाच्या पूजेला बसल्याने आश्चर्य व्यक्त केले गेले. ‘लाल सिंग चड्ढा’ हा चित्रपट सुपर फ्लॉप झाल्यानंतर ‘आमीर सलाम वेंकी’ या काजोलच्या चित्रपटातून पुन्हा पडद्यावर येणार आहे. त्यामुळे हिंदुत्ववाद्यांच्या ‘बॉयकॉट’ मोहिमेला घाबरून आमीरने यावेळी सावध पावले उचलली आहेत. हिंदुत्ववाद्यांचा रोष पुन्हा उफाळून येऊ नये आणि चित्रपट फ्लॉप ठरू नये, यासाठी त्याने आधीच तशी तयारी केल्याचे दिसून येत आहे. दरम्यान, शाहरूखने कितीही तोंड लपवून मंदिराचे उंबरे झिजवले, तरीही त्याचा उपयोग शून्य आहे. त्याला सर्व धर्मीयांचे प्रेम मिळाले म्हणून चित्रपटसृष्टीत तो मोठा झाला. परंतु, एकाच धर्माविषयी गुणगाण गात दुसर्‍यांना कमी लेखले, तर मग फ्लॉपचा बोर्ड नशिबात मिळतो. त्यामुळे शाहरूखचे मंदिरात जाणे ही खरी भावना आहे की निव्वळ धूळफेक ते लवकरच कळेल.