वरळी मतदारसंघ कुणाची जहागीर नाही !

 

 

 

राहुल गांधींच्या यात्रेचा देशाच्या राजकारणावर काहीही परिणाम होणार नाही हे सत्य आहे. त्यांची यात्रा वीस दिवस कर्नाटकमध्ये होती, पण तिथे त्यांना पक्ष आणि संघटनेची जोडणी करणे आवश्यक आहे. काँग्रेसमधील स्थानिक नेत्यांमध्ये खूप मोठा अंतर्गत संघर्ष आहे आणि त्यातून काँग्रेस खिळखिळी झालेली आहे. कर्नाटकात काँग्रेसमध्ये गटबाजी आहे, राजस्थानमध्ये देखील पायलट आणि गहलोत यांच्यात एकमत नाही, तिथे देश जोडणे खूप पुढची गोष्ट आहे. तत्पूर्वी राहुल गांधी यांनी आधी काँग्रेस पक्षाला आणि नेत्यांना एकमेकांशी जोडून संघटन मजबूत करावे. त्यामुळे देश जोडण्याच्या वल्गना करणाऱ्या राहुल गांधी यांनी आधी पक्षाकडे लक्ष द्यावे आणि मगच भारत जोडण्याच्या गोष्टी कराव्यात अशी आमची भूमिका आहे.

 

कुठल्याही राजकीय पक्षाचे आणि त्याच्या ताकदीचे मूल्यांकन हे निवडणुकीतील निकालांवर अवलंबून असते. सध्या देशात गुजरात आणि हिमाचल प्रदेशामध्ये विधानसभा निवडणुकीचे बिगुल वाजलेले असताना त्यांचे नेते मात्र इतर राज्यांमध्ये यात्रा करत फिरत आहेत. त्यामुळे क्षीण झालेल्या आपल्या पक्षाला मजबूत करून निवडणुकीत आपली स्थिती सुधारणे हे राहुल यांच्यासाठी महत्त्वाचे आहे की इतर राज्यांमध्ये यात्रेच्या नावाखाली पर्यटन करणे त्यांना महत्त्वाचे वाटते याचा विचार काँग्रेस पक्ष आणि राहुल गांधी यांनीच करावा. काँग्रेसच्या अशाच उथळ वर्तनामुळे लोक त्यांना सातत्याने नाकारत असून इतर पक्षांचा पर्याय स्वीकारत आहेत. या दोन्ही राज्यांमध्ये भाजपच मैदानात असून भाजपचाच या दोन्ही राज्यांमध्ये प्रचंड बहुमताने दणदणीत विजय होईल हे हे निर्विवाद सत्य आहे.

 

 

 

कुणावरही वैयक्तिक टीका करण्याचा माझा प्रयत्न नाही. देशातील प्रत्येक मतदासंघावर प्रत्येक भारतीयाचा अधिकार आहे, त्यामुळे कुणीही कुठूनही निवडणूक लढाऊ शकतो. कुठल्याही पक्षाचा, व्यक्तीचा किंवा कुटुंबाचा कोणत्याची मतदारसंघावर कब्जा असू शकत नाही किंवा ते तसे करू शकत नाहीत. सध्या उद्धव ठाकरेंच्या नेतृत्वातील शिवसेना ही खरी शिवसेना नाहीच. स्वातंत्र्यवीर सावरकर, बाळासाहेब ठाकरे आणि हिंदुत्वाचा विचार पुढे घेऊन जाण्यासाठी शिवसेनेचे कार्य सुरु करण्यात आले होते. परंतु या सर्व सिद्धांतिक बाबींना बाजूला सारून शिवसेना कुटुंबकेंद्रीत पक्ष झाला असून तुष्टीकरणाचे प्रयत्न ठाकरेंकडून सुरु आहेत. त्यामुळे उद्धव ठाकरेंची शिवसेना वसुलीसेना बनली असून बाळासाहेबांना प्रेरित असलेली एकनाथ शिंदेंची शिवसेना आमच्यासोबत आहे हे सध्याचे वास्तव आहे.