पवारांची चाकरी...

असे म्हणतात की, राजकारणात कोणी कोणाचा फार काळ शत्रू अथवा मित्रही नसतो. राजकारणातही कधी फासे उलटतील, याचा नेम नाहीच. त्याचाच प्रत्यय महाराष्ट्राच्या राजकारणात अलीकडच्या काळातही आला. त्यातच पत्राचाळ गैरव्यवहार प्रकरणी तुरुंगातून जामिनावर बाहेर आलेल्या संजय राऊत यांनीही नुकतेच एक विधान केले. त्यांच्या म्हणण्यानुसार, ‘2024 पर्यंत महाराष्ट्रात पुन्हा महाविकास आघाडीचा मुख्यमंत्री असेल.’ खरंतर राऊतांचे आभाळाइतके राजकीय दावे-प्रतिदावे हाच स्वतंत्र संशोधनाचा विषय ठरू शकतो. कारण, उद्धव ठाकरे महाराष्ट्राचे मुख्यमंत्री असताना ‘पुढचे अडीच वर्ष नाही, तर 50 वर्षं शिवसेनेचाच मुख्यमंत्री महाराष्ट्रात असेल,’ असे विधान राऊतांनी केले आणि महाविकास आघाडी सरकारला अडीच वर्षे पूर्ण होताच शिंदेंच्या बंडाने हे सरकार पत्त्यासारखे कोसळले. पण, राऊतांनी यंदा 10, 20 किंवा 50 वर्षांची नव्हे, तर जेमतेम उरलेल्या अडीच वर्षांपुरती काय ती राजकीय भविष्यवाणी केली. कारण, 2024 नंतर काय होईल, याची आज खुद्द राऊतही शाश्वती देऊ शकत नाहीत. त्यामुळे तुरुंगातून सुटल्यानंतर ‘पुन्हा शिवसेनेचा मुख्यमंत्री होईल’ किंवा ‘उद्धव ठाकरेच मुख्यमंत्री होतील,’ यांसारख्या अतिरंजित दाव्यांचा मोह राऊतांनीही कुठे तरी टाळलेला दिसतो. त्याऐवजी ‘2024 पर्यंत महाविकास आघाडी सरकारचा मुख्यमंत्री होईल,’ या राऊतांच्या राजकीय तर्कामागची चाकरी आणि लाचारी समजून घ्यायला हवी. ‘महाविकास आघाडी’ नावाच्या प्रयोगात उत्साहाने सामील झालेल्या शिवसेनेचे दोन तुकडे झाले. एका तुकड्याने सत्ता राखली, तर दुसर्‍या तुकड्याला आता सगळे पुन्हा जोडत बसायची वेळ आली. त्यामुळे अर्थोअर्थी ‘महाविकास आघाडी’ नावाच्या प्रयोगामुळे ठाकरेंची शिवसेना आता आयुष्यभर पवारांची चाकरीच करणार, हे निश्चित. कारण, एकीकडे एकनाथ शिंदे यांच्याशी उभा डाव मांडल्यानंतर ठाकरेंना शिवसेना शून्यातून उभी करण्याचे आव्हान पेलावे लागेल. त्यामुळे सत्ता की संघटना दंद्वात ठाकरेंना संघटनेचा विचार करणे क्रमप्राप्त. कारण, सत्ता आणि संघटना या दोन्ही दगडांवर एकाच वेळी पाय ठेवला की, माणूस कसा तोंडावर आपटतो, त्याचा फटका ठाकरेंनाच बसला. त्यामुळे एकीकडे संघटनेची पुनर्बांधणी करताना सत्तेसाठी मात्र ‘मातोश्री’ला आता कायमच ‘सिल्व्हर ओक’चा टेकू हा हवाच!