आपला तो बाब्या आणि...

‘मराठी राबडीदेवी’ अशा आशयाचे ट्विट जितेन गजारिया यांनी गुरुवारी केले. त्यावरुन शिवसेनेला चांगलीच मिरची झोंबली. मग काय भाजप ‘आयटी’ सेलचे प्रभारी असलेल्या गजारिया यांना लागलीच ‘सायबर सेल’ पोलिसांनी चौकशीसाठी ताब्यात घेतले. पण, मुळात ‘मराठी राबडीदेवी’ या शब्दाचा इतका राग का यावा? कारण, या ट्विटमध्ये कुठल्याही असंवैधानिक शब्दांचा वापर केलेला नाही, ना कुठले आरोप! विशेष म्हणजे, राबडीदेवी या राजदचे लालूप्रसाद यादव यांच्या पत्नी आणि बिहारच्या माजी मुख्यमंत्री. त्यामुळे शिवसेनेला नेमकी ही अप्रत्यक्ष तुलना का बरं इतकी खुपली? खरंतर शिवसेनेच्या नेत्यांनी, मुखपत्राने किंवा साध्या कार्यकर्त्यानेही कितीही खालच्या स्तरावर जाऊन टीका-टिप्पणी केली की ती ठरते ‘ठाकरी भाषा’, ‘शिवराळ भाषा.’ म्हणूनच संजय राऊतांनी अभिनेत्री कंगना रानावतला चक्क ‘हरामखोर’ म्हणत नंतर त्याचा अर्थ ‘नॉटी’ होतो, असे म्हणत निर्लज्जपणे सारवासारव केली. मग राऊत यांची वक्तव्ये म्हणजे ‘शिवसेना स्टाईल’ आणि दुसर्‍याची टीका म्हणजे आक्षेपार्ह वक्तव्य. ही कुणीकडचा न्याय? दररोज ‘सामना’तून भाजपविरोधी अश्लाघ्य शब्दांत गरळ ओकली जाते. मोदी, अमित शाह यांची तुलना तर थेट अफजलखानाशी करणारीही हीच शिवसेना होती! त्याचे काय? काल तर देवेंद्र फडणवीस यांच्या पत्नीला राष्ट्रवादीच्या नेत्या विद्या चव्हाण वृत्तवाहिनीवर ‘डान्सिंग डॉल’ म्हणाल्या. मात्र, शिवसेनेला आणि राष्ट्रवादीला हा महिलांचा अपमान वाटणार नाही. बाळासाहेब ठाकरे तर आपल्या व्यंगचित्रातून आणि भाषणांतूनही तत्कालीन सरकारवर जोरदार फटकारे ओढत. मात्र, त्यावरुन कोणी बाळासाहेबांना एकाएकी अटक केली नव्हती. पण, त्यांचेच सुपुत्र असलेल्या उद्धव आणि नातू आदित्य ठाकरे यांना विनोदांचे एवढे वावडे का, असा प्रश्नही सहज उपस्थित होतो. काही दिवसांपूर्वीच आदित्य ठाकरे यांनी ‘देशात प्रश्न विचारणे गुन्हा समजला जातो,’ असे म्हटले. मात्र, आता महाराष्ट्रात ठाकरेंविषयी उपहासात्मक लिहिणे, बोलणे हा आता गंभीर गुन्हाच समजला जातो. माजी नौदल अधिकारी मदन शर्मा यांना शिवसैनिकांनी केलेली मारहाणही याच पठडीतली होती. तेव्हा, शिवसेनेने ‘आपला तो बाब्या आणि दुसर्‍याचं ते कारटं’ ही अरेरावी थांबवावी आणि सत्तेच्या माजातून चालवलेला हा गैरवापर भविष्यात आपल्यावरही उलटू शकतो, याचे भान ठेवावे.