‘लव्ह जिहाद’द्वारे फसवणूक? सिन्नरमध्ये युवतीची आत्महत्या!

 नाशिक : ‘लव्ह जिहाद’मधून फसवणूक झाल्याच्या नैराश्यातून सिन्नरमध्ये एका २४ वर्षीय तरुणीने आत्महत्या केल्याचा खळबळजनक प्रकार उघडकीस आला आहे. याप्रकरणी संबंधित आरोपी तरुणाविरोधात तातडीने ठोस कारवाई करण्याची मागणी विविध स्तरांतून होेत आहे. परंतु, पोलिसांकडून अपेक्षित कारवाई होत नसल्याचा आरोप सर्वपक्षीय कार्यकर्त्यांकडून करण्यात येत असून याप्रकरणी शुक्रवार, दि. ७ जानेवारी रोजी मोर्चा काढण्यात येणार आहे.सिन्नर येथील रहिवासी असणारी एका २४ वर्षीय युवतीने गेल्या आठवड्यात गुरुवार, दि. ३० डिसेंबर, २०२१ रोजी आत्महत्या केली. या घटनेप्रकरणी सिन्नर पोलिसांनी तपासात ढिलाई केल्याचा आरोप करत बुधवार, दि. ५ रोजी सर्वपक्षीय कार्यकर्त्यांनी सिन्नर पोलीस ठाण्यात धाव घेत अधिकार्‍यांवर प्रश्नांची सरबत्ती केली. युवतीच्या मृत्यूप्रकरणी समाज माध्यमांवर विविध संदेश फिरत होते. मात्र, असे असतानादेखील पोलिसांनी स्वतःहून त्याची दखल न घेता तपासात ढिलाई केल्याचा आरोप केला आहे. मुलीचे नातलग व मैत्रिणींचे जबाब का घेतले नाही? मुलीच्या ‘व्हॉट्सअ‍ॅप चॅटिंग’चे विश्लेषण का केले नाही? संशयित आरोपीचे नाव घेतले जात असताना त्याची चौकशी का केली नाही, याबाबत त्यांनी पोलिसांना जाब विचरला.

या युवतीचे पितृछत्र हे तिच्या बालवयातच हरपले होते. तिचे संगोपन आत्या आणि आजी-आजोबा यांनी केले. मात्र, कोरोना लाटेत तेही निवर्तले. वडील सिन्नर येथील एका दुकानात काम करत आपला उदरनिर्वाह करत असे. त्याचवेळी त्यांची ओळख रईस इब्राहीम शेख या तरुणाशी झाली. यानंतर दोघांमध्ये प्रेमसंबंधही असल्याचे बोलले जाते. परंतु, या तरुणाने आपण आधीपासून विवाहित असल्याचे पीडितेसह तिच्या कुटुंबीयांपासून लपविले. यातूनच या दोघांमध्ये वाद होऊन फसवणूक झाल्याच्या नैराश्येतून तरुणीने गळफास घेत आपले जीवन संपवल्याचे बोलले जात आहे.मात्र, पोलिसांनी याबाबत सर्व कायदेशीर पद्धतीने तपास न करता पीडितेला न्याय दिला नसल्याचा आरोप करण्यात येत आहे. यावेळी भाजप नेते भाऊसाहेब शिंदे, जयंत आव्हाड, ‘वंजारी फाऊंडेशन’चे प्रदेशाध्यक्ष कृष्णा दराडे, काँग्रेसचे तालुकाध्यक्ष विनायक सांगळे, नगरसेवक प्रमोद चोथवे, सोमनाथ वाघ, राष्ट्रवादी काँग्रेसचे अध्यक्ष राजाराम मुरकुटे, राष्ट्रीय स्वयंसेवक संघाचे समाधान गायकवाड, मुजाहिद शेख, मोहसीन शेख, कुणाल हांडे, सविता कोठुरकर, रूपाली काळे, मंगल झगडे यांच्यासह कार्यकर्त्यांनी पोलीस ठाण्यात घेराव घातला. युवतीला मानसिक, शारीरिक त्रास देण्यात आल्याची मुलीचे शेजारी चर्चा करत असताना त्यांचे जबाब का नोंदवण्यात आले नाही, असे प्रश्न उपस्थितांनी केले. यानंतर पोलीस निरीक्षक संतोष मुटकुळे यांना बोलावून निवेदन देण्यात आले.