रस्त्यावरील मुलांसाठी ‘दादाची शाळा’

त्यानंतर अनेक शिक्षण पद्धतीदेखील अभिजितने समजून घेतल्या. रस्त्यावरील लोकांकडे बघणारं कुणी नाही आणि ज्या काही संस्था आहेत, त्या त्यांच्या जेवणासाठी, राहाण्याच्या सोयींसाठी काम करतात. मात्र, त्यांना स्वावलंबी बनविणारी संस्था सध्याच्या काळात दुर्मीळच. रस्त्यावरील मुलांनी भीक मागू नये, त्यांनी शिक्षित व्हावे, त्यांच्याकडे बघण्याचा समाजाचा दृष्टिकोन बदलावा, या हेतूने अभिजितने पुण्यातील सारसबागेत पोतराज समाजातील 12 मुलांना घेऊन पहिली रस्त्यावरील शाळा सुरू केली.

शाळेतील मुलांना त्यांच्या ज्ञानप्राप्तीच्या क्षमतेनुसार प्रथम, द्वितीय आणि तृतीय स्तरावरील शिक्षण दिले जाते. गणित, मराठी, इंग्रजी, विज्ञान यांसारख्या विषयांचे सामान्य तथा प्राथमिक ज्ञान मुलांना दिले जाते. दररोज जवळपास तीन ते साडेतीन तास शाळा भरवली जाते. विशेष म्हणजे, अभिजितला या उपक्रमामध्ये शुभम माने, स्नेहल भोसले, वैभव काचले, अंजली शिंदे या सहकार्‍यांचेही प्रचंड सहकार्य मिळते. दादाच्या शाळेत स्वयंसेवक म्हणून काम करण्यासाठी अभिजित युवकांना वेळोवेळी आवाहनदेखील करत असतो.

विशेष म्हणजे, आतापर्यंत 76 मुलांना सरकारी शाळेत प्रवेश मिळवून देण्यातही अभिजित यशस्वी ठरला आहे. अनेक मुलांकडे महत्त्वाची कागदपत्रे नसतात. मात्र, त्यांना शाळेत दाखल केल्यानंतर त्यांना शाळेच्या दाखल्यावरून अनेक कागदपत्रे तयार करता येऊ शकतात. त्यामुळे शाळेतील प्रवेश महत्त्वपूर्ण आहे. “मी शिकवलं तरी ते त्यांना जगताना उपयोगी पडेल. मात्र, पुढील जीवनासाठी या मुलांना शालेय प्रमाणपत्र महत्त्वाचे आहे,” असे अभिजित सांगतो. सुखवस्तू कुटुंंबात जन्म घेऊनही अभिजितने रस्त्यावरील आणि वंचित मुलांसाठी ‘दादाची शाळा’ सुरू करण्याचा निर्णय घेतला. एका शाखेपासून सुरू झालेला हा प्रवास तब्बल 12 शाळांपर्यंत येऊन ठेपला आहे. अभिजित पोखर्णीकरच्या या प्रामाणिक प्रयत्नांना दै. ‘मुंबई तरूण भारत’कडून मनःपूर्वकशुभेच्छा...