जहन्नुम-ए-तालिबान

 

 

आता तालिबानसारख्या दहशतवादी गटाने संपूर्ण अफगाणिस्तानचा घास घेतल्यानंतरही या देशात दहशतवादी हल्ल्यांचे प्रयोजन ते काय, असा प्रश्न पडावा. कारण, तालिबानचे सरकार म्हणजेच इस्लामिक ‘शरिया’ कायद्यानुसार चालणारे शासन. मग आता तिथे कुठल्याही परदेशी शक्तीविना इस्लामिक राजवट असताना ‘इसिस’कडून साखळी बॉम्बस्फोटांचे नेमके औचित्य ते काय? याचे उत्तर म्हणजे पूर्वीपासूनच तालिबान आणि ‘इसिस’चा छत्तीसचा आकडा! कारण, तालिबानचे लक्ष्य हे केवळ अफगाणिस्तानची सत्ता काबीज करण्याचे होते, तर ‘इसिस’ला हवा आहे तो वैश्विक जिहाद! म्हणूनच इस्लामिक इराक, सीरिया उद्ध्वस्त केल्यानंतर आता ‘इसिस’ने त्यांचा मोर्चा अफगाणिस्तानकडे वळवलेला दिसतो. तालिबान सरकार सत्तेत आल्यानंतरचा ‘इसिस’चा हा पहिला दहशतवादी हल्ला होता, याचाच अर्थ आगामी काळातही अशाप्रकारच्या हल्ल्यांनी अफगाणिस्तान पुन्हा हादरू शकते. म्हणजेच, आता अफगाणिस्तानातील सत्तासंघर्षात तालिबान आणि ‘इसिस’ या दोन्ही इस्लामिक कट्टरतावादी संघटनांचा ‘जिहाद’च्या नावाखाली जीवे मारण्याचा रक्तरंजित खुनशी खेळ खेळला जाईल.