खासदार ऑस्कर फर्नांडिस यांचे निधन
Total Views |
नवी दिल्ली : काँग्रेसचे ज्येष्ठ नेते आणि राज्यसभा खासदार ऑस्कर फर्नांडिस यांचे मंगळुरूमध्ये निधन झाले. ते ८० वर्षांचे होते. जुलैमध्ये योगासने करत असताना पडल्याने त्यांच्या डोक्याला मार लागला. त्यावेळपासन त्यांच्यावर उपचार सुरू होते. फर्नांडिस यांच्या जाण्याने सर्वच राजकीय पक्षांनी शोक व्यक्त केला आहे.
जुलैमध्ये घरातच योगासने करत असताना फर्नांडिस पडले. त्यांना रुग्णालयात दाखल करण्यात आले होते. त्यांच्या डोक्याला मार लागला. मेंदूमध्ये रक्तस्त्राव झाला होता. यावेळी त्यांच्यावर एक शस्त्रक्रीयाही करण्यात आली असून त्यांना अतिदक्षता विभागात ठेवण्यात आले होते. उपचारा दरम्यान त्यांची प्राणज्योत मालवली.
फर्नांडिस यांना रुग्णालयात दाखल केल्यानंतर काँग्रेसचे ज्येष्ठ नेते सिद्धरमय्या आणि डी. के. शिवकुमार यांनी त्यांची भेट घेतली. फर्नांडिस यूपीए सरकारमध्ये केंद्रीय परिवहन मंत्री होते. राहुल गांधी यांचे निकटवर्तीय म्हणून त्यांची ओळख होती. राजीव गांधी यांचे संसदीय सचिव म्हणूनही त्यांनी काम पाहिले होते. ते अखिल भारतीय काँग्रेस कमिटीच्या केंद्रीय निवडणूक प्राधिकरणाचे अध्यक्ष होते.
फर्नांडिस यांनी १९८० या वर्षात कर्नाटकच्या उड्डपी मतदारसंघातून लोकसभा लढवली. निवडणुकीत ते विजयी झाले. त्यानंतर याच मतदारसंघातून त्यांनी १९८४, १९८९, १९९१ आणि १९९६ मध्ये विजय मिळवला. १९९८मध्ये ते राज्यसभेवर गेले होते. २००४मध्ये पुन्हा त्यांची राज्यसभेवर निवड करण्यात आली होती.