केरळमध्ये झिका व्हायरस आढळून आला आहे,काय आहे झिका व्हायरस ?

जगभरात कोरोनाचे थैमान माजले असताना केरळमध्ये झिका व्हायरस आढळून आला आहे. एका गर्भवती महिलेचे रिपोर्ट पॉझिटिव्ह आले आहेत. ही महिला ज्या रुग्णालयात उपचार घेत होती, तिथल्याच काही नर्स आणि डॉक्टरांचे नमुने देखील तपासणीसाठी पाठवले असता ते देखील पॉझिटिव्ह आल्याचं सांगितलं जात आहे.

झिका व्हायरस डासांमुळे होतो.हा संसर्ग डासांच्या एडीज या प्रजातीद्वारे पसरतो. हे डास सहसा दिवसा चावतात. झिका विषाणूची लागण झालेल्या व्यक्तीचे रक्त पिल्याने डासांना विषाणूची लागण होते. त्यानंतर ते डास इतर लोकांमध्ये विषाणू पसरवितात. गर्भवती महिलांवर झिका विषाणू प्रभाव करतो. यामुळे जन्मणाऱ्या मुलांना मायक्रोसेफॅली हा आजार होऊ शकतो. यात जन्मणाऱ्या मुलांचे डोके अपेक्षेपेक्षा लहान होते आणि मेंदूवरही त्याचा परिणाम होण्याची शक्यता आहे . झिका विषाणूचा संसर्ग एखाद्या संक्रमित व्यक्तीशी लैंगिक संबंध किंवा दूषित रक्त स्त्रोतांसारख्या इतर माध्यमांद्वारे होऊ शकतो.

ताप, डोकेदुखी, स्नायू आणि सांधे दुखी, शारीरिक अशक्तपणा, डोळे लाल होणे, उलटी, ही झिका विषाणूची लक्षणे आहेत. झिका विषाणूचा प्रसार होत असलेल्या प्रदेशातून परत आल्यावर आपल्याला लक्षणे दिसल्यास, वैद्यकीय मदत घेणे महत्वाचे आहे. झिका विषाणूच्या संसर्गाची लक्षणे अनेक इतर कारणांमुळे देखील दिसू शकतात. डॉक्टर आपली लक्षणे आणि प्रवासाच्या तारखांवर आधारित झिका विषाणू संसर्गाचे प्रारंभिक निदान करु शकतात.